健身房我待不住，但跆拳道館我可以揮汗一小時不想停… - Owen＠taekwondowen

你有冇試過啲朋友約你去健身房，「操下啦，夏天要着背心啊！」你話好啊，拎住水樽同毛巾一齊去，結果喺跑步機度行咗五分鐘，就開始望牆，望人，望住自己點解仲喺度。

係啊，我明。健身房啲空氣，好似裝咗靜音器咁沉悶，大家都戴住耳機，冷氣勁凍，鏡入面嘅自己好似問緊：「你做緊咩？」

但喺跆拳道館，一切都唔同晒。

拳頭未落，汗已經出

第一次入跆拳道館，嗰陣我都冇諗過會愛上。以為只係打打踢踢，點知一熱身就跑步、深蹲、踢腿、彈跳，熱完身已經汗出到似落雨咁。但奇怪係——我竟然笑住做完成個鐘。

因為呢度無人扮型，無人擺pose，大家係真係認真訓練，齊齊哄咁打氣。啲氣氛唔同晒，好似每一個動作都係為咗一個目標：變強。

講真，打拳並唔係跆拳道嘅全部。

跆拳道訓練唔單止提升體能（耐力、爆發力、核心力量），更加練腦。點樣控制自己情緒、點樣喺對手出腳前睇穿意圖、點樣瞬間判斷反應——全部都係腦同身體一齊work。

仲有節奏感、平衡、專注力。你會慢慢發現，打得跆拳道勁唔代表你打得贏，而係你識點樣唔輸。

結合傳統韓國歷史文化，係學習當中除咗訓練自己的身體，更加可以聽下故仔。係練習招式嘅過程當中，又反思自己會唔會有可能面對危險嘅時候唔識保護自己。

打交唔啱，但比人打個陣唔識還手，或者都係助長人地蝦蝦霸霸嘅推手。

你可能諗：唔係小朋友或者想打比賽先學咩？

錯晒。其實唔少人入場都係因為想減壓、想學自衛、想搵返對身體嘅掌控感。特別係成年人生咗小朋友、做咗全職工，想搵返個「自己嘅時間」——跆拳道可以畀你一個出口，唔洗講太多，踢落沙包嗰一刻，就夠晒爽。

你仲會認識唔同年紀、背景嘅朋友，一齊揮汗、一齊中招、一齊笑，咁樣交流，邊似普通健身房咁各自為政？

健身房你對住冷冰冰器械，冇人會理你啱唔啱做。跆拳道館就係師父會望住你，話你邊個動作唔啱，甚至會一對一教你發力、擺位、收腳——你唔使怕唔識，入嚟就會慢慢學到。

最重要係：你唔會覺得孤單。

你唔會再數住set數數住時間，因為你會被對手挑戰、被同伴鼓勵、被師父嘅聲音推住。時間一眨眼就過，完堂嗰刻你會唔捨得走。

現代人咩都有，手機、冷氣、Netflix，缺嘅係熱血同堅持。

學跆拳道就係俾你一個理由，唔再係被動吸收娛樂，而係用身體輸出意志。

你會重新認識自己身體極限，突破完一招，下一堂又進一步。跌倒？無問題，踢腿失準？正常，最重要係學識站起身，踢多次，直至踢中。

呢種進步感，會滲透返你日常工作、感情、人生。

可能你都一樣，覺得自己未fit，未準備好。但我想講，冇人入場第一日就識踢高腳，冇人一出場就做跳後踢。

你唔使快，但你一定要開始。

如果你一直諗住要搵一種運動，但唔想再喺跑步機上跑住懷疑人生——試下跆拳道啦。

你可以留言搵我，或者DM我Facebook / IG。只要你肯行第一步，我哋一定會扶你走第二步、第三步。

入場費冇你想像咁貴，制服一套夠你用三四年，你會發現你最值得投資嘅，其實係你自己嘅身體、勇氣，同你每日放工後仲想變好嗰份心。

跆拳道館唔係比人打交嘅地方，係比人發現自己更強嘅地方。

今日開始，揮一身汗，換一個你。