內容創作新時代：AI文案 vs 人類風格，誰勝出？ - Owen＠taekwondowen

你有冇試過咁嘅場景——打開社交媒體，一篇篇標題勁吸睛嘅貼文跳晒出嚟：「3秒教你變有錢」、「99%人都做錯呢件事」、「呢個秘密醫生唔會話你知…」

你明知可能係clickbait，但又忍唔住click入去。睇完，覺得勁順、勁流暢、勁合理——但一分鐘後，內容講咗啲乜你又唔記得。

呢啲，就係典型AI生成嘅文案：高效、吸睛、極速產出，但…你會記得佢，定係記得你朋友嗰句「我真係撐唔住啦，好想辭職」？

呢篇文，我哋就嚟講清楚，AI文案同人手文案嘅分別，唔係「邊個寫得靚啲」，而係你想觸動邊個，打動邊個，留下咩印象。

AI文案：數據導向嘅內容魔術師

AI寫文，勁在乜？係可以喺零感情嘅情況下，精準命中你嘅情緒按鈕。

佢識得分析網絡大數據、學習用戶行為、掌握SEO關鍵字，知道邊啲字眼會吸引你停低，邊啲語氣會令人share得多，邊啲格式可以令內容「睇落好專業」。

例如：

「5個你一定要知道的減肥技巧」

「2025年最值得投資的10種副業」

「懶人必備：30分鐘搞掂一週餐單」

呢啲文案寫法幾乎無懈可擊，靚到連你阿媽都忍唔住Like。AI用嘅字眼經過無數測試，比好多行銷copywriter都熟悉「轉化率」同「點擊量」個秘密。

但問題係——感覺好似有啲空。好睇，好讀，好平滑，但冇火，冇刺，冇咁容易入心。睇完成篇文，可能淨係記得個標題，但內容又係千篇一律，無乜特色同記憶點。

相比之下，人寫嘅文案，唔一定流暢。可能語法有錯、句子唔夠精煉、成段跳來跳去，但你會感覺到：有個人喺背後。

一篇好嘅人手文案，就好似你同老友喺茶記嘆奶茶時聽到對方傾訴——真、肉酸、有時自打嘴巴，但就係咁樣先打動人。

佢可能會咁寫：

「我唔係專家，但呢幾年真係捱得辛苦。每日寫文、剪片、搵客，一邊驚AI會取代我，一邊又要用AI幫我做埋啲我唔識做嘅嘢。你話係咪好矛盾？」

呢段，冇乜SEO，冇乜「最佳標題」，甚至連「Call to Action」都冇。但讀落，你可能會想like，甚至想覆一句：「我都係咁諗。」

SEO嘅世界，好似一場永無止境嘅升級遊戲。你要識：

關鍵字佈局

meta描述

標題優化

internal linking

readability score

AI喺呢方面幾乎係戰神級別，但人手文案要兼顧呢啲，往往會令風格受限。為咗令Google讀得明，往往寫到自己都唔想讀。

咁即係點？放棄SEO？唔係。

最理想嘅做法係：AI做助手，人做作者。
你可以用AI幫你搞keyword排位、重寫句子、計分數，但最尾果份情感、幽默、真誠、故事性，係你比落去，唔係機器。

有人話，AI會取代文案人。
我話，AI只會取代唔願進步嘅人。

寫文依家唔係「你vs AI」，係「你同AI點樣拍住上」。
AI幫你打底、做結構、搵素材，然後由你出手加情感、添共鳴、放自己經歷落去。

你睇前IKEA香港小編就知啦——唔止寫post，係寫氣氛，係打入香港人情緒共鳴最底層。佢哋出嘅文案，你可以話係抽水，但抽水之餘都要有共嗚你先知佢抽緊乜水。你以為其他品牌小編唔識寫文咩？識架，個個都有文案訓練。但唔係個個都有「sense」。

嗰種sense係咩？係當全港喺講某樣嘢嘅時候，你可以喺同一節奏底下，加自己tone落去；係懂得講人哋未講出聲，但心入面想講嘅嘢。呢種直覺，係AI無論睇幾多數據都練唔到返嚟嘅。

未來最好嘅文案，應該係：

用AI嘅效率、速度、優化能力

加上人嘅情感、誠意、記憶力

再滲入獨有嘅風格同真實經歷

你可以話AI係一個超強助手，幫你打開大門，但真正走入人心、攪動情緒果一刀，仍然要靠你自己。

試下搵一篇你最近用AI生成嘅內容，拎返出嚟，唔改格式，只加情感。
講下點解你寫呢篇文、你自己點諗、你經歷過乜。你會發現，AI打草稿，你做靈魂，先係最強嘅組合。