如果容易接受情緒價值，你也同時有可能容易被PUA

香港人平時口硬，心就軟，特別係一到夜晚，好多嘢都變得脆弱。試想像，你放工捱咗一日老細嘅屎忽鬧，搭港鐵又迫到成沙甸魚，返到屋企打開WhatsApp，見到有人同你講：「今晚有無掛住我？」你心諗：吓，佢都會關心我？於是，明明個人累到核爆，都即刻回：「有呀，你呢？」你知唔知，呢下，就係你既容易接受情緒價值，亦係你容易俾PUA入侵嘅第一步。

情緒價值，唔係咩高深嘢，簡單嚟講，就係有人令你Feel Good。可能係講笑令你笑到噴水，或者係聆聽你煩惱，或者只係每日一句「今日辛苦你啦」。喺呢個咁多壓力嘅城市，有人識送你一點溫柔，已經係莫大嘅安慰。正所謂，一句「返到屋企未呀？」都比「今晚食咩」感覺更浪漫。

但偏偏，就係呢種「好想有人明白我」嘅心理，成為咗PUA嘅溫床。PUA最叻，就係見到人需要情緒價值，佢就扮演「唯一可以畀到你情緒價值嘅人」。佢識得送關心、送甜言蜜語、送心靈按摩，頭幾個月係免費試用期，甜到好似食緊黑松露朱古力。然後，一聲令下，佢開始冷落你，或者話：「你係咪唔夠好？所以我無Feel。」你會即刻好驚失去佢，開始反省係咪自己唔夠好，仲可能想再付出多啲，證明自己值得愛。

阿強三十歲，做IT，性格有啲內向，一世人都未拍過拖。有一日佢係一個聯誼局識咗個女仔，個女仔叫Kiki，外表唔算特別靚，但笑容甜到化。第一日就加WhatsApp，成日同佢傾心事，話自己啱啱分手，好需要一個可以依靠嘅人。

阿強第一次有人對佢咁多情感投射，即刻心郁郁。Kiki會半夜Send語音，話：「我覺得你好特別，你聽我講嘢嘅時候，我好安心。」阿強聽到心花怒放，好似發現咗生命意義。三星期後，Kiki開始慢慢講自己經濟壓力，話屋企人唔支持自己，成日想離開香港，但又冇錢。

阿強就諗：「咁可憐，我應該幫下佢。」於是第一次畀咗幾千蚊佢做生活費。Kiki收咗錢，仲對佢更熱情，每晚一個晚安語音：「無你我唔知點算。」阿瀚覺得，自己終於遇到一個願意依靠佢嘅人。

點知到第六個星期，Kiki開始冷淡，回覆慢咗，甚至幾日唔回。阿強忍唔住問：「你係咪唔開心？」Kiki先答：「唔係你問題，我自己好亂。」再後來，佢突然又再Send一條長語音：「如果你真係在乎我，可以再支持我一次嗎？只要呢次，我就會同你認真開始。」阿強當時已經有種上咗賊船嘅感覺，但又好驚失去呢份親密感，結果再畀多次錢。你估Kiki之後點？消失得無影無蹤。

「我知大家都話我蠢，但嗰陣真係覺得，如果我再好啲，佢就會留低。」

其實，呢就係PUA嘅精髓——用情緒價值「養大」你對佢嘅依賴，再利用你嘅恐懼。

有人因為想要情緒價值，結果跌咗入PUA嘅陷阱。你要記住，有情緒價值係好事，但唔代表你要全盤信任每一個對你好嘅人。尤其係嗰啲——認識無耐，就話你好特別；同你傾兩次，就講自己有幾慘；成日要你證明對佢有幾重要；或者話全世界都唔明佢，淨係你明。呢啲，都係高危Signal。

好多香港人都唔肯承認，自己好需要情緒價值。覺得講出口就示弱。但人唔係機械人，誰人唔想被重視？我想講，想要情緒價值唔係錯，但要有個底線——你唔可以為咗換取情緒價值，而容忍對方羞辱你、冷落你、玩弄你。因為到最後，你會連自尊都輸埋。

講到尾，我今日想留低一句比你——下次有人對你特別好，先唔好即刻飛身撲埋去，試吓問自己：佢係咪想用呢份好，換取咩？如果問完你都唔覺得有問題，咁先再投入感情。因為真正愛你嘅人，係唔需要你用自尊去換。

你今個星期，試吓做一件小事：每日花五分鐘，同自己傾偈，問自己「我今日有咩開心嘢係由自己畀自己嘅？」無論係買杯奶茶，定係落街行一圈，都係情緒價值。先練習自己畀自己開心，先唔怕人哋拎情緒價值嚟做武器。

你值唔值得被愛？值得。永遠都值得。但首先，要確定，你愛嘅自己，係一個有底線、有自尊嘅人。