文化唔係奢侈品，但…

最近睇到一部關於健身室嘅韓國連續劇，忽然個人有點感觸。一個好有心兼有料嘅教練，就算教嘅嘢幾好幾有人鍾意，都徘徊著係執笠邊緣。

講起香港嘅創作，你諗起啲咩？

係咪以為做創作人＝搞吓畫展、寫吓詩、開Patreon收下粉絲錢、喺IG出靚相、接下sponsor，然後去咖啡店打卡、生活chill爆？

唔好意思，現實係：好多創作人已經係社會嘅最底層——甚至跌落地心。

「創作」係咩？唔係娛樂，而係社會肌肉

你諗吓，一個社會冇創作，會變成點？

就好似一個人冇肌肉——睇落冇病，但郁兩郁就攰，跌低一次要三日先爬得返起身。

文化肌肉都一樣。平日你未必察覺佢存在，但喺你迷失、焦慮、想搵返自己嘅時候，你就會明白，原來你一直靠住啲詩、啲歌、啲文、啲畫——去撐住你個人精神唔爆煲。

但喺香港，呢班「維他命C」級嘅創作人，卻日日要為生存打仗。

內容免費文化，造就「睇到飽，冇人養」嘅怪現象

你會發現，香港人對內容有極高標準，但同時極低付出。

要靚圖，要深入分析，要爆like金句，要有社會意識，但又唔想畀錢；

寫得好？「你應該多啲曝光」；

寫得差？「唔洗理佢啦唔識寫」；

搵人打賞？「呃錢」；

搵企業合作？「出賣靈魂」；

靠自己搞創作品牌？「冇出路啦，返去打份工好過啦。」

香港創作圈，好似一個開咗健身房但冇收月費，連健身器材都係創作人自己搬入嚟——你嚟練得開心，但佢日做夜做唔夠錢交電費。

文化輸出困難，人才流失係真

你睇吓台灣，有文化部、文策院、補助金、內容節目export平台；
韓國有文化立國，CJ ENM、Netflix Original節目自家監製；
中國有短視頻平台幾十億播放量，一句話變現五百萬。

香港呢？創作人上IG tag親「sponsor」就被人話「做KOL咁cheap」；講少少社會議題又話你「講政治唔專業」；你出書冇人買，開展覽要自資，開Patreon又俾人話：「咁都要錢？」

所以香港創作者就好似同香港嘅職業運動員有啲相似，一年四季為咗比賽練習、教練費自己比再做埋教練個份、支援少、自己操自己、自己拍片、自己剪、自己sell。

讀者話：「我支持創作呀！」但冇人留低

最戇居係，香港人唔係冇文化欣賞力，係冇被教育過「要點樣養一個創作人」。

佢哋好真心留言：「你篇文好感動，哭咗。」

但下一秒就碌走咗

「打賞？下次先啦」

「睇完無聊吓姐，唔洗真係畀錢嘅」。

呢種心態，就好似你上完跆拳道堂，仲同教練講：「你啲教得好好呀！學到好多嘢！下次我帶埋朋友再嚟玩！」，下次真係有再嚟，但學費從來都無交過。

如果你以為我講故仔，其實我本人其實遇唔少呢啲情況。唔少學生同你講窮，但轉個頭食餐飯貴過個堂學費，而教練本人就係度食風。

教練有屋企要交租，創作人都有腦要食飯——講真，「讚好」係精神支持，「打賞」先係營養補給。

咁點解唔放棄？

間唔中會問自己——寫嚟做咩？又唔係養到自己。

但我真係停唔低。

其實理由好低能，因為我真係好鍾意寫文。

我由中學開始創作網絡小說，到後來因為創作小說而有第一份兼職搵上門。但我鍾意寫文唔係因為有錢收，而係唔寫硬係覺得人生差啲嘢。

但我都係人，就算未稱得上豐衣足食，但都想可以食飯可以隨便叫凍飲。

創作係免費？

如果你睇到呢度，係咪諗講到尾我都係想叫你磅水？
但我其實想問：你想唔想香港未來仲有人繼續創作？

我認識嘅創作人其實都無乜要求，真係有小小鼓勵，可能夠佢燒多一年，講足一世。

其實唔使你出一份糧比人，由你可以由今日開始，睇到覺得一篇文令你值得思考有得著嘅文章，唔一定要多，一杯咖啡、一個菠蘿油嘅價錢，已經足夠令每一位創作人寫多一篇、捱多過一日。