用AI做文書，唔代表你冇創意——真正冇創意嘅，係你對創意嘅定義

你以為ChatGPT幫你寫Proposal就唔算創作？你錯得好徹底。

幫你寫Email、撰文案、改報告格式，你講得出，AI幾乎都做到。而你呢？坐喺度開始質疑人生——「我咁樣算唔算抄功課？」

但講真，有冇人話你用Google搵資料就等於冇腦？

以前我哋查字典仲要逐頁翻，宜家你打個“define serendipity”即刻有答案，咁你又冇話Google係作弊工具。點解一講AI，你就開始心虛，好似用咗就冇靈魂咁？

其實，用AI唔係偷懶，反而係你終於開始用腦。

真正嘅創作，唔係你想像中咁辛苦

喺香港，創意經常被誤會。大家以為要夠「原創」、要「白紙黑字自己砌出嚟」、最好仲要爆肝捱夜開通頂咁嘔心瀝血做出嚟——咁先算係真創作。

如果創意只係靠咁嘅熬夜靈感，「凌晨三點聽見海哭的聲音，突然靈光一閃寫出嚟。」，咁我不如轉行做廟祝等神明降筆啦。

咁樣搞落去，咪又係日日OT寫唔完報告、諗唔出IG caption，仲以為自己係內容創作者。實情係，內容係有，但創意？唔好呃自己。

其實大部分人所謂嘅「創作」，不過係喺資訊過剩之下打緊自己腦汁。你以為你係創作者，實際上你係內容農場搬運工，勉強堆砌出一篇Post，心諗：「都唔錯啦。」但其實你寫完都唔記得自己講過乜。

Sorry，咁樣唔係創意，係苦力。

真正嘅創意係咩？

唔係閉門造車，而係擅用資源，以最短時間，講到最強訊息。

呢句聽落好似project briefing，但佢係真。創作唔係靈光一閃，而係一種選擇——你選擇點樣拆解問題、重組資訊、傳遞訊息。

創意從來唔係孤獨嘅產物，而係一場合奏。你有冇試過用AI寫五個唔同版本嘅開場白，然後拎嚟A/B test？你有冇試過叫AI幫你將繁瑣嘅內容轉成表格、或寫成一篇中學生都睇得明嘅講稿？

你有冇試過叫AI幫你模擬客戶口吻再回覆電郵？或者寫一封拒絕客戶又唔失禮嘅信，唔使每次都用「多謝你寶貴嘅意見，我哋會考慮」咁敷衍。

呢啲唔係懶，係進化。
係你開始識得用工具，解放創作肌肉，而唔係只靠死撐。

三招見效，用AI幫你重塑內容

想做出有「你味道」嘅內容？唔使死撐硬寫晒全部，亦唔需要叫AI幫你寫哂全部。AI唔係代替你，而係加乘你。

AI出草稿，你再入靈魂
無論係文案、簡報、企劃書，先叫AI起稿，你再落調味，改tone，補細節，變成自己風格。當然，調轉都無問題，你寫草稿，搵AI同你校對延展，補充你想要嘅文章，修改你嘅文筆錯別字，一樣都係幫你慳返唔少時間。

將AI當第二人格
好似打拳咁，佢出一招，你反一招。唔啱唔緊要，佢唔嬲你。你可以狂試無限個方向，唔會有PM鬧你話你改太多次，亦唔使拎feedback返去再鬧自己「點解我唔早啲諗到」。

用AI做你創意節奏嘅節拍器
寫唔到時，先唔好搵靈感，搵Prompt先，諗下大方向，或者求其一啲關鍵字，轉去搵啱指令，等AI幫你起步，落筆就快好多。好似以前band房練鼓咁，冇節拍器你成日拖拍，AI就係你寫作嘅節奏師傅。

換言之，你唔係唔creative，係你從來冇人教你點樣同AI夾Band。

AI唔係敵人，可能係你最忠誠嘅拍檔

你以為AI最終會取代創作人？我同你講，會被取代嘅，唔係唔creative嘅人，而係唔願變嘅人。

試諗吓，舊時印刷都係手動排版，而家連報紙編輯都用AI預測標題點樣多click。肯試、肯用、肯錯、肯改，先係未來最搶手嗰班。

AI唔係寫手。AI係你副手。你負責諗tone、定方向、決戰高峰。副手就幫你撐場、鋪路、防失誤。

你以為你請咗個寫手，其實係你請咗個AI軍師。

以前你一份Proposal改十次，改到懷疑人生；而家AI幫你生成三個Version，你揀一個，再按個「延展」掣，煮個杯麵返嚟已經有稿喺度。咁你話係懶，定係高效？

創作唔再係「爆肝」，而係「搵人幫你代肝」

喺一個OT變成常態、KPI當飯食嘅城市，創作人經常冇得休息。你每日食麥皮時諗brief、等紅綠燈時改captions，連去廁所都忍唔住諗文章flow。

但依家，AI可以幫你減壓，唔係取代你個腦，而係幫你爭返時間。

冇錯，AI唔會幫你愛人、唔會替你悲傷，但佢可以幫你寫封解釋自己點解遲交嘅Email，文情並茂，冇錯字，仲可以啱格式。

即刻試以下Prompt👇

「請幫我用幽默口吻寫一篇IG post，主題係『下雨日唔想返工』，再建議三個tag同一個吸睛開場白。」

你會發現，用得其所，AI唔係代替你，而係幫你走得更遠。

最後送你一句：

創意唔係比人讚你寫得幾好，而係你敢唔敢寫出你嘅聲音。AI可以幫你搵聲，你要負責講出個tone。

唔好再話AI冇靈魂，其實一直冇靈魂嘅——可能係你自己。但好消息係，唔遲，只要你願意，今日起你可以重新搵返創意。用AI唔係作弊，而係終於攞返時間，做一個真正有創意嘅人。