【港產片變咗樣】由《英雄本色》到《媽媽的神奇小子》：當原創故事讓位現實改編

喺八、九十年代，香港電影有幾型？簡單講，就係型到甩轆、笑到噴飯、喊到抽搐。要型嘅有《英雄本色》，周潤發一句「我等了三年，就是要等一個機會！」、要搞笑又有《賭》系列，王晶日日寫、周星馳夜夜拍，爆笑背後又藏著一份無奈與人情味，笑中有淚，正是港產片特產。

以前睇戲係一件期待嘅事。你永遠唔知下一套係劉德華定黎明先係臥底，定係大家都等星爺話「我養你啊」。創意爆棚、風格多變、講人情講命運講身份認同。而家呢？

「真事改編」成為主流：電影定係新聞回顧？

你唔會唔記得《媽媽的神奇小子》——一部以蘇樺偉為藍本嘅傳記電影，感人至深、賺人熱淚，仲拎到唔少獎。再嚟一套《濁水漂流》，探討無家者議題；但同時間出名嘅電影，《白日之下》、《年少日記》、《正義迴廊》……幾乎套套都可以加返句：「根據真人真事改編，某年某月，某某案件……」

2024年香港電影金像獎入圍最佳電影五強，除咗《命案》同《毒舌大狀》勉強屬於虛構，其餘作品都係現實取材，冇錯，好戲；但問題係——好戲唔等於原創，呢種「真實依附症候群」，好似係唔知幾時開始滲入香港電影業每一條血管。

無間道去咗邊？英雄精神去咗邊？

2000年代初你睇《無間道》，兩個臥底唔想做卧底但又一定要做卧底嘅故事；《PTU》就連一晚警察巡邏都拍到好似黑白棋咁緊張；《黑社會》就講得明——選舉係一場血戰。

嗰陣時嘅原創，不一定「真」，但絕對夠港味、夠膽講、夠癲、夠風格。甚至《喜劇之王》、《少林足球》，乜嘢唔係原創？你估周星馳真係去中國廚藝學院搵長丈練少林功夫？

現實故事冇罪，但原創精神唔應該判死刑

你可以話，今時唔同往日。港產片冇錢拍特技、冇市場養天馬行空、冇平台養長線故事發展。當年《無間道》一套戲可以拍三集，仲可以變做美國版《無間道風雲》再拎埋奧斯卡；但而家一套《濁水漂流》拍完，口碑有，但票房有限，下一套都唔知有冇。

於是，最安全方法就係搵真事改編。故事唔使諗、情節唔使創作、連宣傳tagline都寫好晒：「改編自真人真事，感動全城」。

問題係，當所有導演都向現實埋首，你會發現，好多電影都開始撞樣。媽媽捱住病養仔，老師帶領學生成長，社工拯救邊緣青年，已經唔止一兩套拍過。

而觀眾唔係唔想睇真實，但都想見到幻想、見到可能性、見到香港人創作故事嘅野心。

有人話，呢個轉變係因為社會氣氛變得敏感、資金來源收縮，拍戲唔再可以亂嚟。講兄弟情，驚講到黑社會；講臥底，怕你影射政治；講仇殺，驚引發聯想。

於是，真實成為最安全的包裝，政府資助也好、電影發展基金也好，都樂意批畀社會關懷題材。你有冇發現，好多近年得獎電影都係「社會問題電影」：無家者、少數族裔、多元性別議題、照顧者壓力、單親家庭、末期病患……

套戲拍完，好似完成咗一份社工功課，導演攞獎，觀眾喊完，冇人話唔好，但你問：「下一套又係咁？」

創作力唔可以俾現實打敗

近年嚟講嘅原創作品，其實我好鍾情《明日戰紀》同《飯氣攻心》，一部樂意嘗試港產片嘅闊度同高度，究竟港產片仲可以玩乜嘢主題？仲可以用乜嘢技術去完成一部動作片？《飯氣攻心》用細嘅場境創造一幕接一幕笑中有淚，迴響甚高嘅作品，一家人，原來可以好複雜，但都可以好簡單。

《命案》算係少數新嘗試，講一宗有點懸疑、有點驚悚、有點心理暗湧嘅故事；再前少少有《智齒》——視覺風格強烈到你唔敢眨眼。呢啲就係原創力量，唔靠真人故事，都拍到你手心出汗。

我哋唔係唔想睇「媽媽點樣養大個仔」，但我哋更想睇一個只會喺香港發生、得香港人先寫得出嘅故事。

下一部戲，可唔可以唔好再係新聞改編

唔好誤會，我依然會支持感人真事，但我個人更加期待——創作嘅世界，可以比現實更真、更震撼、更港味十足。

香港電影唔應該只係社會縮影，佢應該係香港人想像力嘅代言人。下次入戲院，我唔想再見「改編自真人真事」，我想見——電視寫出嚟嘅香港，無人見過，但一睇就知係香港。

我好希望香港電影可以再拍出一部爭氣嘅港產電視，唔係要話俾人聽港產片威！而係要話俾人聽，港產片冇咗嘅嘢，香港人可以親手攞番！