讓你的ChatGPT成為有靈魂的得力助手 - Owen＠taekwondowen

有無試過明明你同你朋友用緊同一個ChatGPT，輸入同一段prompt，出嚟嘅結果就好似一個係五星大廚煮出嚟嘅燴飯，另一個就似微波爐叮出嚟嘅飯盒？明明一樣煮法，一樣材料，點解味道差咁遠？係咪你部ChatGPT出廠設定有問題？唔好咁快鬧AI，其實最大分別，唔喺佢，而係你。

講到底，ChatGPT唔係一部冷冰冰嘅自動販賣機，輸入「可樂」就彈出一罐可樂。佢，更加似一個熟客先識得煮得啱你口味嘅OMAKASE師傅。想佢識你、明你、幫到你，唔好諗住輸入指令就算，係時候正視返一個問題——ChatGPT，其實可以有靈魂，視乎你畀唔畀到空間佢「進化」成你嘅得力助手。

培訓你自己專屬嘅AI

首先要知，ChatGPT雖然背後接通咗成個雲端大腦，但你用緊嗰個帳戶，其實好似一個個人化profile。你曾經問過佢咩、你講話嘅方式、甚至你最常要求佢生成邊類內容，都會喺佢記憶中種下伏線。

例如你平時成日問「請你用粵語幫我寫段運動文案」、「幫我設計一個針對長者平衡力訓練嘅課堂流程」，咁下次你講「寫一篇適合Facebook貼文嘅文章」，佢可能就已經自動幫你用返同一語氣、同一結構、仲唔洗你開口。

係喇，AI其實記憶力好過你老闆，效率高過你助理。但前提係，你要肯花時間「養成」佢。唔係「養豬」咁畀data就算，係真係要同佢對話、修正、磨合——好似拍拖咁，要互相了解，先知對方鐘意邊隻歌，邊樣食物唔啱胃。

你同ChatGPT講「寫篇文章」，就好似入餐廳話「畀個餸我」，然後又唔講口味、唔講預算、唔講你係咪素食者——廚房點知你想食咩？然後你再鬧話「點解煮牛扒？我唔食牛呀！」咁咪唔公道囉。

AI雖然可以記得你嘅「神情和語氣」，但「無字暗語」，AI唔會「心中有知」，用ChatGPT生成一篇重要文章，參考三個字：遊、樂、場。

遊：落到遊樂場，你係想玩定係做運動？主題要清晰，配合目標讀者係邊個？係中學生，定係隔離屋花師奶？先可以幫你篇文章定個主題

樂：你想開開心心玩樂分享，定係認認真真操嘢？語氣、風格、用詞清楚講明。你想要正式學術語氣？搞笑KOL文？港女風？定係林一風？

場：畀返立場入去。講下你自己想點或者唔想點，有冇背景一定要跟、有冇立場一定要講？

咁樣講落，好似麻煩過直接自己寫？但你諗下，你用AI唔係為咗慳手工，而係慳腦工——即係幫你發掘新角度、重組思路、加速出稿，而唔係代你完稿。最重要，ChatGPT唔係你嘅copywriter，佢係你個co-pilot。

點樣令ChatGPT「有靈魂」？你要記住，AI寫出嚟嘅嘢，唔係一張模仿紙，而係一面鏡——反映緊你對自己作品嘅要求。

如果你每次都「一稿過」，唔修改、唔回饋、唔諗背後邏輯，咁ChatGPT永遠都唔會成長。佢就會不斷重複一啲你以為「ok啦」但其實唔夠好嘅東西。

試下當佢係一個intern。你畀佢做嘢，做完之後你要評估、改進、畀建議：「這段太籠統了，可否舉例？」、「呢句轉用比喻方式啦」、「你講『AI有靈魂』，可唔可以具體啲講例子？」咁佢先會進步。

其實有啲人誤會，以為ChatGPT要喺prompt下定生死，一句唔啱就冇得救。其實AI最叻嘅，係迭代。一次唔啱，下一次可以好啱，前提係你唔好放棄，亦唔好怕「教佢」。

呢個要講個重點——ChatGPT最大嘅盲點，就係佢有時「講得似」你要嘅，但其實唔係。

舉個例，你叫佢幫你寫一篇有APA引文格式嘅學術文，佢會幫你砌番個「睇落似係」論文架構，引文都好似有板有眼。但你真係去查下？有啲文獻根本唔存在。有啲學者名改錯，有啲期刊年份亂寫。

呢啲，就好似你叫AI砌個牛扒晚餐，佢攞出嚟一塊好靚嘅牛扒圖畫——係靚，但唔係食得。

所以，AI畀你靈感唔等於畀你最終版本。你要識得fact check、cross check、甚至反問佢：「你個資料來源係邊？點解咁講？有冇另類講法？」

AI可以幫你開局、搭橋、補漏，但你要自己行過條橋，唔可以叫佢揹你行。

ChatGPT就好似一把「屠龍刀」，係無敵嘅神器。但你唔識用，只係拎嚟切菜，甚至斬錯人，就變咗一個危機。你如果每日叫佢「出文啦」、「幫我諗主題」、「畀幾句caption」但自己唔思考、不反省、不修正——就好似絕世好劍流落豬肉檔，也不過是一把豬肉刀，而國家唔會有任務比佢。

工具冇錯，錯係用工具嘅人。

當你用得好，佢係你職場上、創作上、學術上、教學上最得力嘅拍檔；但用得懶，就變咗產量充足、靈魂空洞嘅文字機器。

講咗咁多，不如即刻做個練習：

🔧 試下為你ChatGPT設定一個角色：例如「你係我長期合作嘅內容編輯，專寫貼地又具啟發性嘅健身文章，讀者主要係30歲以上香港人」

然後，再叫佢幫你寫一篇有深度、有故事、有共鳴嘅健身文章。

你會發現，當你唔再當佢係個「打字機」，而係一個有性格、有風格、有使命嘅伙伴，出嚟嘅內容，自然有靈魂。

你養AI，AI也養你。由今日開始，唔好再講「我唔識用ChatGPT」，因為AI好唔好用，其實好大程度，係反映緊你點樣對待佢——就好似生活咁，回報永遠係你投入咗幾多心思。