你以為自己老咗，其實只係退化得快咗。

「年紀大咗，就唔應該再做太多運動啦。」
「唔好再跳啦，小心跌親。」
「企唔穩？正常啦，老咗喇嘛。」

如果你聽過以上呢啲說話，甚至自己都唔自覺咁樣諗，其實你可能唔係真係老咗，只係相信咗自己應該要老。但事實係：退化唔等於衰老，而衰老亦唔等於冇得逆轉。

今日要同你講嘅，就係：你其實未老，只係退化得快咗。

老化不等於退化

想像下你部手機，兩年無更新，成日跳App、卡機、電量一晚就冇晒。係咪「老咗」？未必，只係你冇俾佢好好保養。人嘅身體都一樣，退化唔係因為年紀，而係長期無用、無練、無俾機會佢保持狀態。

肌肉、骨質、神經反應——呢啲都係會因為唔用而加速流失。如果你一日都無郁過下肢，企唔穩其實好合理；但只要重新訓練，60歲一樣可以企得穩，仲可以跳得起。

根據美國運動醫學會（ACSM）建議，老年人每星期應該進行至少150分鐘中等強度嘅有氧運動，以及兩次肌力訓練，以保持功能性體能（functional fitness）。但香港呢，大多數人連郁都唔敢郁。咁，退化點會唔快？

打破宿命論：年紀唔係藉口，係起點

我哋成日覺得「年紀大咗，就應該接受慢慢衰退」，好似冇得揀。但你諗真啲，咩叫做「應該」？係身體話晒事，定還是你自己放棄咗身體？

睇返現實，有唔少60歲以上長者，都因為持續訓練，做到一般30幾歲人做唔到嘅事。跑馬拉松、做深蹲、單腳企、彈跳訓練⋯⋯全部都係可能。

例如日本一項針對長者跳躍訓練（plyometric training）嘅研究指出，65歲以上參與者只需進行八星期低衝擊跳躍訓練，其平衡能力、下肢力量及反應速度均有明顯改善，跌倒風險亦明顯下降。

而係筆者過去訓練長者的日子期間，其實唔少長者都能夠做到非常靈活同敏捷嘅動作同反應，就算做一啲中青年人睇落會覺得辛苦嘅動作，例如波比跳，深蹲跳等等，傳統覺得長者會因為膝關節問題而唔應該做嘅動作嚟講，其實一樣都係做得好。不過要留意，每個人身體狀況唔同，開始任何訓練之前，最好先問過醫生或物理治療師，根據自己情況慢慢加強強度。

你話：「但我真係唔夠力，點跳得返高？」

我話：「你冇力，先至更要跳返高。」

點解咁講？身體係會學嘢嘅器官。只要你俾正確嘅刺激佢，就會出現適應反應——肌肉會變強，關節變靈活，神經反應快咗，反應更靈敏。再講得簡單啲，跳唔高，就練跳。企唔穩，就練企。冇力，就練返有力。

唔使玩 CrossFit，唔使舉重 100kg，由低開始做起，已經足夠你慢慢將身體叫醒。

一個簡單入門例子（60歲以上適用）：

椅子半蹲跳：坐喺凳邊，嘗試唔用手起身，再慢慢站直，之後輕輕做一個小跳（腳指留喺地面，腳掌離咗地就可以），重複 10 次，感覺自己下肢發力。

單腳站立：扶住椅背，單腳站立 10 秒，每邊 3 次。改善平衡力，強化腳踝。

抬膝踏步：當做行軍咁抬高膝蓋踏步，每次 30 秒，連續做 3 組。

如有曾跌倒、骨質疏鬆、心臟問題等，請先徵詢醫療專業意見，調整動作幅度或改用替代訓練。

做得耐咗，慢慢會感覺到唔同——樓梯好行咗，等巴士企得穩，晨早起身唔再腰酸腳軟。

真實例子：證明「唔老得咁快」係可能

筆者見過一位七十零歲嘅婆婆（雖然睇落唔似），初初嚟做訓練時，覺得自己最多都只能急步行，唔可以跑步。佢話因為驚跌親，唔敢郁。結果個半月左右，佢唔止識跑仲識跳添。

佢同我講：「原來只要郁多咗，個人就會想郁多啲。覺得自己冇咁快老。」

呢句，其實你都可以講得出口。

事實上，好多時唔係睇你郁唔郁到，係你幾時由「想郁多啲」變成真係「郁多啲」。當你有呢個改變，成件事就會唔同哂。

結語：想證明自己未老？行動就係最好嘅證據

退化唔係命運，只係結果；年紀唔係障礙，只係起點。你願意重新訓練，就能夠重新定義自己。唔好俾觀念困住自己，畀個機會自己行多一步，跳多一下，挺直腰板再望遠少少。

下一次你跳起嚟嗰一刻，就係你同自己講：「我仲未老。」最有力嘅證明。

如你想進一步開始「逆齡訓練」之路，你每日輕鬆郁一郁，身體都可以重新屬於你自己。

記住：你有得揀，而你仲有時間。唔好再等，由今日開始郁。