休息唔代表停低：聰明訓練嘅真正起點

你係咪成日對自己講：「唔可以停，停就會打回原形」？ 健身路上，你好可能已經唔係輸喺意志，而係輸喺冇俾自己復原嘅空間。

唔休息，就唔會進步。呢句說話唔係雞湯，而係實實在在嘅科學原理。

「堅持」唔等於「日日爆操」

堅持唔係日日逼自己去gym做運動，而係每日都問清楚自己點解要訓練。

你可能覺得唔操就係懶，其實真正嘅堅持，係喺需要休息嘅時候，仍然選擇信任自己——相信身體知道幾時要慢下來。長期過度訓練會導致中樞神經疲勞、免疫力下降、甚至影響情緒穩定。真正堅持，係懂得平衡操練同復原。

我哋係訓練有一樣好重要嘅概念，訓練唔係計一次兩次，而係一個周期嘅累積。訓練係訓練周期嘅一部份，休息都係。

肌肉唔係練出嚟，係休息時長出嚟

當你訓練時，其實係破壞緊肌肉纖維。要令佢變得更強，必須經歷修復階段。所以，唔俾身體時間修復，就算操得再狠，都只會適得其反。

曾經有一位學生跟我做運動，但有兩個星期明顯越做越差，我就問佢，你平時自己會做啲乜嘢？佢就話佢將我教嘅運動，每日做三次，日日做，話希望咁樣會更加快有效果，但問題係，食藥都唔會一次過食哂一日份量會快啲好，身體反而會適應唔到。所以千祈唔好諗住勤力就一定得，真係隨時會得不償失。

Active Recovery：復原唔代表hea住唔郁

所謂「主動式恢復（Active Recovery）」，係指以低強度活動促進血液循環、加速代謝副產品清除，例如：

慢步行、輕鬆踩單車

動態伸展（Dynamic Stretching）

瑜伽與深層呼吸

滾筒放鬆（Foam Rolling）

冷熱交替水療

休息做得好，下一次操得爆。

有時候，做長時間低心跳率嘅運動，都可以算係一種休息方法。因為休息唔單止係要令身體「受傷」嘅位置唔郁，亦都需要令新陳代謝所產生的廢物帶走，先至會有效令自己恢復，所以透過長時間嘅低心跳運動，有效刺激身體血液流動之餘又唔會帶嚟大太負擔，令個人可以更加好咁恢復身體。

「操死自己」可能係種情緒逃避

問下自己，你係咪透過操練去麻醉焦慮？

唔少人透過高頻訓練填補內心空虛。但過度訓練唔單止打擊生理機能，連動力同心理狀態都會崩潰。記住：訓練應該係你照顧自己嘅方式，而唔係懲罰自己嘅手段。

學識「週期化訓練」：進步有時，休息有序

專業運動員訓練都分階段：

基礎期（Build）：提升耐力與基本力量

強化期（Peak）：挑戰極限，增強表現

恢復期（Deload）：降低訓練量，整合成果

呢個方法叫做週期化訓練（Periodization）。聰明嘅人，係懂得幾時進攻，幾時撤退。肌肉、神經、情緒都要reset先會長期進步。

點樣知道自己係咪真係需要休息？

以下係幾個指標，幫你判斷係咪應該休息：

訓練後特別易攰

睡眠質素下降

長時間無法提高重量或表現

訓練後情緒低落或失去動力

如果出現以上兩項或以上，就係時候調整節奏。

休息，係下一次爆發前嘅蓄力

真正嘅強者，唔係日日出手，而係日日觀察自己身體，了解自己狀態，然後做出最有智慧嘅決定。

唔操嗰日唔代表你放棄咗，而係你幫緊自己準備好再上多一層樓。

下一次瞓醒，個人fit過前日，咁先係你訓練旅程最有力量嘅證明。