香港都做到大製作娛樂電影《九龍城寨之圍城》

我其實唔太期待本片，喺未知係漫畫改編電影前睇到預告就聞到好大陣伏味，後來知道咗當然都有啲改觀，但正如曹劌論戰「夫戰，勇氣也。一鼓作氣，再而衰， 三而竭 。」一開始吸引唔到我，就點到無太大吸引力。但與友人去一看究竟後……

 

好睇！

好好睇！
好_好睇！

 

本文就做一個film review，觀察主流正反評論後，同大家分享《九龍城寨之圍城》好睇喺邊，同埋啱用一個咩期待值入場，當中有咩亮眼位，又有咩沙石需要討論。頭盔要戴好，本片係娛樂片，雅俗共賞，就唔會有太多高深電影藝術，爽快感美感係重點。而網上有人覺得劇本差，都值得攞出嚟討論討論。

 

劇本係咪咁敗bug

 

先淺談故事。開場2-3分鐘講舊時，龍捲風（古天樂繹）廿年前統一咗龍蛇混雜嘅九龍城寨，然後直入廿年後介紹主角，偷渡佬陳洛軍（林峯繹）為咗身份證打黑市拳搵錢，誰不知得罪黑道大老闆（洪金寶繹）然後逃到九龍城寨，再被城寨人以為自己搞事大打出手。講真，一開頭講故嘅情節我唔多喜歡（不過設定嘅野，點都要搵位塞，加上早啲令觀眾了解背景都未必係壞事）。而且陳洛軍得罪大老闆情節預告已經有，令我對劇情驚喜大打折扣。

 

但編劇細節又處理不錯，片中對白精簡上口自然，無言語交代漫畫式嘅動作，但又睇到角色招式嘅特點，同時又出人意表。例如陳洛軍打黑市拳三番四次忍痛手執玻璃碎打倒對手，睇得出其心狠手辣，同時無時無刻都為生存而拼命嘅特點；陳洛軍被追殺時及時上咗巴士，當觀眾都為佢鬆一口氣嘅時候，反派王九（伍允龍繹）喺旁邊嘅窗外出現都係一種好好嘅處理方式。節奏快嘅電影好易落入一開打打足廿分鐘嘅悶局（例如美隊3機場果幕），哩種快中有慢又突然嚇一嚇，有令觀眾坐過山車嘅感覺。加上編劇好叻用伏筆，電影前後有唔少可以呼應嘅情節，睇得好舒服。

 

當然都難免有沙石，港漫中難免有叔伯恩怨設定，哩啲點拍點寫都麻麻地。最大問題係，其實陳洛軍係香港出世，本身可以攞身份證。不過講故唔好搏故，哩個沙石個人覺得冇太影響整體氣氛。大家又點睇，不坊討論下。

 

演員識得演 唔係咁易

 

如果大家有睇動畫《我推的孩子》，天才童星過戲後只好拍爛片，面前冇budget嘅場地、冇戲嘅對手、求其嘅製作，自己演技再好都無從發揮。但最慘嘅係，大眾係唔會理場口因素，雪亮眼睛一眼就知演員好唔好戲，但佢哋從來唔會理解一個「演技」係包咗美術形象動作導演嘅想法，有時真係唔到演員去演繹。所以一路講戲，我都會避免討論演技，亦都唔好意思討論。

 

但係今次唔同，演員們嘅表現正正表達到我對演技嘅想法：

 

1. 導演知要用咩效果；
2. 動作美術指導出色；
3. 演員有時間去沉浸；

 

王家衛導演電影時不時就拍五年十年，演員們有時間去浸淫喺角色當中，緊係扮得似啲啦。然而普通電影製作時間半年唔夠由前期到上映，心理細節不能追求更高，就會畀觀眾一個「新演員唔識嘅感覺」，觀眾係唔會錯嘅，只不過對電影哩回事睇得唔夠通透。

 

講返本片，動作夾快到位，花式華而到肉，加上利用城寨特色進攻，例如小巷、天線水喉等，都加深觀眾沉浸感。不得不提四仔（張文傑繹）長時間帶面具，只可以運用眼神動作去演一個神秘角色，難道之高表現出色。其他大部分角色都有合格以上嘅成績。

盡咗力 做得好

 

又要鞭一鞭「明日戰記」，明明大家都係三億製作，畀一個CG佬做咗條showreel。本片導演就好了解自己想做咩畀觀眾。就係要做一條本土爽片，有本土香港，有爽快打鬥，有畀青年演員上位嘅機會，有畀世界睇到香港電影仲有光彩嘅一面。講真嘅，爽度劇情整體都不比marvel漫改電影差。當然唔可能同其他IP比較，人哋做咗廿年，我地先剛剛開始，有好多野要摸要試，但依家先第一集，期待團隊keep住把火，愈做愈有。既然香港有人有心有力做得出好戲，不如大家都支持下。