Dune : Part 2 史詩級大作 定 娛樂大作

 

上星期喺朋友邀請下，睇咗兩集DUNE，無錯，我係無睇第一集。所以喺忙碌嘅工後時間描兩個多小時去補課睇返第一集。

 

簡單帶入上一集內容；喺一個人類可以坐太空船穿梭浩瀚宇宙嘅時代，有一類神奇物質「香料」，係宇宙旅行必須物質，而已知宇宙中，只有沙漠星球「厄拉科斯」可以生產香料。主角保羅係亞崔迪家族嘅王子，亞崔迪家族被宇宙帝王詔命遷徙到厄拉科斯開采香料。事實上，帝王係驚咗亞崔迪家族權力愈來愈大，當亞崔迪家族去到「厄拉科斯」，就暗地同原本管理「厄拉科斯」嘅哈肯能家族合作，將亞崔迪家族屠殺。而主角保羅同媽媽潔西嘉就逃過一劫，遇上沙漠嘅原住民「弗瑞曼人」，同埋保羅夢中出現嘅情人「荃妮」。一個弗瑞曼人要求同保羅公平決鬥，贏咗先可以保佢母子平安。而保羅就成功咗，人生第一次殺人。

 

（必須要睇第一集，因為兩集內容係直接相連）

 

小小劇透，真係小小，自行選擇

 

承接上集，母子一開始就被哈肯能家族派兵追殺，幸好有熟悉沙漠嘅弗瑞曼人利用地形，加上召喚沙漠大boss「沙蟲」，成功回到弗瑞曼人據點。母子兩人分別踏上成長；潔西嘉飲下弗瑞曼人嘅「生命之水」成為佢哋聖母；而保羅就學習沙漠嘅生存之道（加溝女）。弗瑞曼人宗教傳承千百年，會有一個救世主救贖佢哋，保羅喺沙漠嘅各種英姿令弗瑞曼人聯想到救世主，唔少人開始「睇佢頭」，成為佢哋嘅領導者。

 

宗教的力量

 

原著作者法蘭克·赫伯特喺訪問中講過。形象十分正面、被視作歷史上最偉大總統之一嘅甘乃迪係眾多總統中最危險嘅一個；反觀，醜聞多多嘅尼克遜總統則是對美國甚至世界有最大得益嘅美國總統。原因係甘乃迪領袖能力好高，一聲令下，萬人和應。然而危機在於人們會盲目跟隨，容易引發狂熱與不理性，失去思考能力，當有人反對自己，就好似反對偉大領導一樣。而尼克遜，一個會因醜聞而被彈劾下台嘅總統（唔了解嘅朋友可以google一下水門事件）。

 

電影中，保羅就正正係萬年無一嘅領袖，又靚仔又好打又有腦又有背景……加上中晒古預言中所有項目。令千千萬萬弗瑞曼人跟隨。加上上文提到生命之水保羅都有飲到，係唯一一個飲完企得起身嘅男性，而飲完後，保羅得到「預知」能力。了解人類將會面對嘅災難，得知古今因果。而「預知」都真係只係「預知」，沒有改變未來嘅能力。所以喺飲完生命之水後保羅有一種無奈。自身只可以無力地等待「預知」嘅未來。

 

但人民又點會知咁多，佢哋只知道等咗千百年嘅救世命出嚟打救佢哋，可以遠離沙漠哩個極地。就算保羅極力否認，佢哋只不過當佢謙虛，更加信佢係救世主。世上眾多故事提到信念好強大，喺DUNE都有哩個體驗，只係盲目嘅信念，可以令一個國家，一個生態，一個星球，一個宇宙搞到天翻地覆。

 

一書小說 消壞電影人腦細胞

記得2021年有朋友睇完 Part 1，覺得音效好好，其他無咩特別。而小弟一連睇完兩集，我會話第一集係向大家講述沙漠星球嘅科技同人物關係，都係主角起步階段。例如電影會用大量鏡頭去拍飛機起飛，科技護盾同埋特別技能。喺需要種種鏡頭去介紹世界觀嘅同事，將保羅嘅家門慘劇拍得精彩絕倫，好樣觀眾同情共情。Part 2喺建立世界觀後可以趕火車，一口氣講晒故事。劇情量係Part 1嘅150%（大約啦）。但係小弟覺得Part 2嘅人物關係成長就都有啲趕火車。例如母子飲下生命之水得知一切，性格有變，但舖排時間唔多，觀眾要load一陣後知後覺。而男女主角感情都慢慢咁好快建立起來，都令我有一種矛盾覺得佢哋發展節奏有啲快。然後又要花時間介紹新舊反派，太大嘅世界觀令觀影體驗有鬆散。不過，話就話史詩大作，終究都係娛樂，唔可以當文藝文睇藝術嘅。希望各位可以了解並調整心態，is the time to enjoy the show.