講飲講食 傳統係邊個定

友人「果間上海舖係上海人開，一定有保證。」

本人「咁香港人開嘅茶餐廳，一定間間都好食？」

前幾日同友人見到新店開張嘅簡單對白，引發我寫下文講飲講食，更進一步思考，所謂流行文化，又係邊個令其流行？

誰說Pizza加菠蘿有罪

先講一講傳統Pizza。麵粉，必然要用”tipo 00”；麵團，含水量只可以有60%-65%；番茄醬，只可以加水同鹽先可以特顯蕃茄甜美；厚度，中心位置不能大於0.3cm；時間，只可以焗60-90秒……種種傳統定義下先會有一個，底有碳燒紋理，外酥內濕嘅正宗傳統拿坡里Pizza。

但事實上，以上嚴格製作嘅Pizza，唔，係，傳，統，Pizza。應該係話，以上準則係由「拿坡里真正薄餅協會」（Associazione Verace Pizza Napoletana）定立，而哩個一協會係1984年成立嘅，咁1984年前，係咪冇所謂「傳統」Pizza？番茄都係18世紀先入菜，想食最傳統Pizza係咪應該食Focaccia（無芝士無表面醬汁嘅意大利油麵包）。

三文魚有蟲唔食得

再講講香港人好鐘意嘅壽司。曾經有著名人物甚至日本人指出日本人唔食三文魚刺身，引來部分文化愛好者跟風。食物安全上，三文魚的確不應生食，因為三文魚會喺淡水生殖產卵，而淡水魚因寄生蟲關係不宜生食。然而，日本街頭甚至香港食店食到嘅三文魚，大多數來自挪威，一個幼魚活於淡水，成長後於鹹水監察養殖嘅魚。早於本世紀打入傳統文化深厚嘅日本市場。

以訛傳訛

以上兩個都係傳統嘅傳統例子，食物成為軟文化輸出到外地，當地人理當會成為陳述者，但傳輸傳輸，以訛傳訛定必有誤差，加上世俗文化隨時改變，可能因為產業變化、天然資源、流行文化而有所不同。正如外地人來香旅遊，飲奶茶會去蘭芳園，食燒味會去一樂燒鵝，但香港人就未必食過甚至冇興趣去試。

以至近期有日本團體喺香港跳「科目三」，正正是外地人睇香港文化嘅誤差。我哋去旅行時唔會深入了解當地文化，又或者自以為了解而出現誤差，最後鬧成笑話。但相信大家都有外遊時被用普通話打招呼嘅經驗，可能唔啱聽，但人哋外遊時我哋都冇了解佢哋，佢哋，都冇必要為我哋了解中港矛盾等等嘅社會歷史問題。

了解文化 更重要了解自己

上年同屋企人去日本池袋，因為老豆鐘意烏冬特登搵一間手打烏冬專門店比佢一嘗嗞味。日本手打烏冬有一手製嘅粗糙感，加上優質麵粉，愈咬愈有風味。但係喺兩老眼中，烏冬手指咁粗，更係中間未熟透Al dente口感，時夕冬天，湯頭溫度好快降到室溫，未能浸軟粗厚嘅烏冬，當然唔太享受食哩碗烏冬。

傳統烏冬有咬口，但老人家愛食軟烏冬。咁係店家錯還是老人家錯，定打和super。文化係相對客觀睇，較多數人會更做嘅事，但唔代表主觀感受有錯。從根本睇，其實流行文化本身沒有誰對誰錯。然而，大家好想知誰對誰錯，大家都好鐘意分高下。

就好似每年都會有甚麼甚麼頒獎典禮，去定義那年邊一個係最佳歌手演員，邊套電影邊首金最成功。但其實就係一場又一場「比面派對」。哩個方向睇，舉辦活動嘅單位金主，代表何謂「流行」。同時有人覺得，一人一票比fans人數對樂壇影壇比較好，但其實都係鬥錢多鬥人多，最後都係財團控制人民喜好。

吓，大台又唔得，一人一票又唔得，啫係點啊？問得好，冇人話過要攞獎先係好喎。

回到文首，食Pizza要有協會證明，咁冇證明唔代表唔好食；食壽司安唔安全唔係人講就信，可以了解文化有冇改變；大家睇一套戲聽一首歌，唔係因為有咩獎，有邊個聽過睇過。我哋唔需要別人去證明自己喜好，我鐘意係因為我自己選擇，獨立思考，正正係哩個年代最需要嘅特質之一，因為我哋正處於一個資訊過多，知識太小嘅年代。了解自己，先可以知道自己真正鐘意嘅，才能建立自己品味。