1月號讀書報告 劉以鬯《酒徒》

「一月一書」，係我2024年嘅其中一個目標。雖自中學畢業後養成閱讀習慣，睇咗好多書，但今年想有突破。雖然讀書並非武功，唔係唯快不破，但為自己定一個目標都唔係壞事。

 

（中小學時期有讀書報告，唔睇書嘅我試過交食譜，好似係有關芝士蛋糕做法，結果被人笑到面黃）正如愛因斯坦名言”If you can't explain it simply, you don't understand it well enough”，閱讀最忌為讀而讀，我目標係可以從書中學習並加以表達。因此為咗方便紀錄哩個習慣，試下做讀書報告。而2024第一本，當然係回歸香港文學，就講一本關於文學嘅香港文學，劉以鬯著作《酒徒》。

 

先介紹下作者劉以鬯。我問我爸我媽（佢哋都曾經睇書，果一代人流行睇武俠小說），佢哋竟然唔識劉以鬯。劉以鬯出身於1918年，係香港著名作家，以出人意表嘅創意見稱，都有人稱其作為意識流小說，著名導演王家衛更表明「2046」同「花樣年華」嘅故事正正係啟發自劉以鬯小說，「2046」中嘅「所有的記憶都是潮濕的」就係出自劉以鬯手筆。

 

一個有才華嘅男人，卻無人欣賞，所以無錢，繼而自我懷疑，自甘墮落，最後日日夜夜飲酒。就係酒徒嘅故事。故事講述第一人稱主角老劉，本身對文學創作有熱誠，都有經驗同知識，但要喺香港寫「庸俗」嘅武俠小說為生。更因為生計比朋友呃去寫劇本，最後被朋友偷稿，一分錢都攞唔到。最後更要寫「情色文學」先可以賺到錢，書中描述十分到位：

 

「一個文藝愛好者忽然放棄了嚴肅的文藝工作去撰寫黃色文字，等於一個良家婦女忽然背棄道德觀念到外邊去做了一件不可告人的事情。」

 

書中仲有好多女性角色喺老劉身邊周旋，一個墮過胎17歲少女，因追求刺激引誘老劉令佢要搬走；一個老公長期不在家嘅包租婆想喺老劉身上尋溫暖不成自殺；一個家境貧窮到要做舞女嘅紅顏知己；一個當老劉係死去兒子嘅老婆婆……但不論有多少人關心，幾多酒精下肚，老劉都係唔快樂，因為現實令佢唔快樂。佢喜愛嘅文學喺香港被認定一文不值，如果海明威喺香港寫出「老人與海」都唔會出版成功。 老劉喺香港不能做自己喜愛嘅文藝工作，所以終日沉迷酒精，好似一種幫人逃離不理想嘅現實嘅藥，不論係良藥定毒藥，都要錢。為咗生理同心理需要，老劉都係要寫自己討厭嘅文字，一層一層愈踩愈深，萬刧不復。

 

其實唔只香港，放眼世界，文字/電影/藝術都係同錢有關。書中明指一個愛爾蘭作家喬也斯，生前作品被人偷印、誤解；死後被人稱為20世紀最偉大作家之一；藝術界有以梵高為首，死後先成名嘅藝術家。現實係灰暗嘅，無娛樂性嘅作品唔會比人睇上眼，作者死亡新聞反而會成功話題。愈上心愈心累。今時武俠小說已經唔起流行，但今日嘅英雄電影難道唔係武俠小說2.0咩？書中老劉嘅武俠小說被報社拒絕續稿，原因係故事人物嘅動作唔夠多，因為當時最受歡迎嘅小說都係多動作嘅。如果將「動作」一詞代入成「CG」，觀感就fit晒。酒徒出版於1962年，但當中對娛樂嘅批判、對品味嘅追求、對文學嘅看法，到2024年嘅今日都唔落後。可能有生之年，嚴肅嘅文字/電影/藝術會消失殆盡，文藝愛好者只會更無力，或者好似老劉咁成為酒徒，因為我哋根本冇同現實鬥爭嘅力量。

 

 

最後以MastaMic嘅「流行無罪」作結：

地下上唔到大場面 

嚟自地下嘅永遠只可以企場邊 

望住台上面　七情上面嘅表演

我問音樂係咪就係咁表面

 

（千幾字寫一本長編小說讀後感真係唔易，又唔太想寫太長，唯有只講一兩個點，歡迎大家比意見，希望今年真係出到12編。）