電影《白日之下》感想文

《白日之下》 觀後感

在寫這編文章時，我問自己：是想以推存人去睇這套電影的角度寫？還是以單純寫一編感想文的角度寫？思考良久，最後選擇後者，既然是感想，就寫得通俗一點，看的時候有點一氣呵成就最好不過啦。

不過還是提幾句推存的話吧：陳湛文喎～簡君晉喎～《IT狗》喎～有內涵的香港電影喎～沒理由不入場支持呀。但公道點，如果比較容易情緒化，又或者有PTSD，入場前就請先衡量自己的接受能力。完

好啦，跟住是我自己的感想文，內容可能有點冗長和主觀；怕悶或偏激人士就自行迴避啦。

（下面會改用粵語表達，應該會比較傳神和易理解d)

其實睇完呢套電影，我陷入左幾日自問自答既思考迷宮。

「睇d咁慘既戲仲乜？睇完個世界咪又係咁？

「住係呢個地方就係咁架啦？你唔係仲未接受現實呀 ?」

   當我介紹呢套戲俾人睇既時候，都會聽到類似既反應，就正如套戲其中一句對白：「你唔係覺得呢個世界會為左一編報導而改變。」

「或者…….或者今次就會唔同呢。」腦入面就會浮現係戲入面另一句對白。

其實反映社會議題電影，存在既目的，唔係幫我地去解決任何現實問題，而係令更多人知道社會現狀既同時，刺激我地去思考，同試試轉換角度，站起唔同既立場去思考問題既本質。

「啱定唔啱，事乎觀點與角度啦，你又要諗下照顧呢班等死既人，係幾浪費社會資源，佢哋親人仲慘，係永無休止既惡夢。有d野，係無奈，但係無辨法，係要妥協。正如鮑起靜講：人老左，就係包袱。」

無錯。人總要學會選擇妥協，尤其當你無得㨂既時候，做錯一個決定，可能就瞓街。好似電影入面既殘疾人士同老人家一樣，邊個唔想過正常人既生活，開開心心過有親人陪伴既日子；但佢地因為各種理由無得㨂，唯有選擇妥協；即使旁人覺得佢地無尊嚴，被殘酷對待；但有個家，有個自己既地方，總好過要瞓街。流浪街頭。

「你想我依家當你係負累？定將來你覺得自己係負累，一係依家我走，咁最小將來大家都無機會覺得對方係負累。」

戲中其中一幕，就係鮑起靜同余香凝係屋企既對話，勾起左我呢段回憶，我記得自己聽個朋友講呢句說話既時候覺得好殘忍，因為當時我仲細，唔明當中既含意。人大左，就明白有時殘忍既決定同選擇，都係迫不得已。

「個儍仔死左係好事黎啦，你諗下，佢阿媽根本就覺得佢係負累，如何唔係又點會放佢係私人院舍等死，佢見到自己既好朋友比個咸濕院長性侵，但又無能為力，佢咁樣死左，最小唔駛下半世為自己既懦弱内疚一世，個編劇安排佢死前回憶自己最開心既一刻，都算係一種解脫啦。」

我唔知道編劇咁安排係咪有心，但我諗呢段劇情編排會令睇既人覺得個院長仆街之餘，亦令人感覺到住係院舍既弱勢社群，如果無外力幫助下，就算好似余香凝咁講嗌唔好或者打肇事者都係無用，弱勢既力量就係咁薄弱。

「未知他人苦，莫勸他人善。你睇下套戲結局就知啦，個主角以為自己做好事，最後成班人要搬，你認為班老人家會多謝佢，佢地只會覺得佢為左自己既名利，咩尊嚴公義善良，人都半隻腳入左棺材，仲點會理呢d野。」

我諗編導係想觀眾認清一個事實，就係凡事都有後果，唔係你做一件好事，就代表結局一定好。而且，亦唔係每個人可以理解，公義同善良背後既意義係乜：人類係永遠唔能夠彼此了解，如果可以彼此了解，世上就唔會有戰爭。所謂正義同善良；只係站係卡既正反面，但我同意姜大維：人生，要做好多選擇，而且識做選擇既人好少，而我地唔好為自己認為對的選擇而內疚。