打親交都話MMA唔會覺得你有料，反而係凸顯緊有幾無知

近排唔知乜嘢原因多咗好多新聞都報導有人係街邊打交，但係新聞還新聞，報導還報導，點解硬係要話人哋係街頭MMA？講出嚟究竟係勁啲吖，定係寫果個真係識分乜嘢係MMA。但怨筆者直言，寫得出嚟嘅人，幾乎都唔知MMA係乜。係唔知頭唔知路亂咁寫啲嘢落去，咁真係代表你有料啲？如果你見到一部小巴撞巴士，你會唔會寫佢係林寶堅尼撞波子？唔會？咁點解你係要寫MMA？

個個都學打拳，到底學緊乜拳？快速分辦乜拳打乜拳 

！！！MMA不是一種武術！！！

首先要非常簡潔又嚴重地提醒一件事，MMA本身根本連武術都稱不上。MMA由此至終就是一種運動型式，而隨著發展了一段時間，現在的MMA早就變成一種規範化的比賽，甚至對於習武者而言，MMA變得太過規範化，而又同時存在不統一的情況，例如不同賽會對於賽例上有不同的規限和理解，但總合而言還是有一個共通點：MMA本來就是一項比賽，而根本不是武術。

所以「街頭混戰MMA」，直譯成中文就是「街頭混戰綜合格鬥」，文詞不通順，何以又可以成為報導標題？

MMA的全名是Mixed Martial Arts，中文有譯為「綜合武術」或「綜合格鬥」，意思就是指融合了多種不同的武術而產生的一種模式，而不是「一種武術」。而MMA本身是一套概念，繼而演化至有比賽模式，最讓MMA這種概念成名的，是美國舉辦的UFC「終極格鬥冠軍賽」。因此，如果記者們硬要說在街頭上演搏擊大戰，說成「街頭混戰UFC」比起「街頭混戰MMA」來得合理得多。

MMA和打交的分別

這個問題同樣可以用另一種概念去思考，為甚麼打交要稱為MMA不稱為其他武術，諸如跆拳道空手道柔道合氣道洪拳詠春泰拳太極呢？

我嘗試代入記者諗法，以往其實都有記者鍾意將「打交」換成其他武術，特別喜歡講成係「泰拳」。點解唔係拳擊唔係摔跤，要特別標明係「泰拳」呢？如果用最簡單嘅諗法，係因為泰拳有齊拳腳肘膝，「好似」乜都用得，所以就講成係泰拳。

又，咁點解依家又唔話「泰拳」，要講成係「MMA」？我估，最大唔同係MMA有扭鬥，有落地。但其實，MMA落到地都好，仍然都有一堆規則要守，唔係真係乜都用得。比如話落咗地唔會咬人，近年嘅賽例亦唔可以用腳踢落咗地嘅對手等等。所以同樣，MMA只係「好似」乜都用得，實際上好多嘢都係唔用得。

同理，當街頭打交，邊個得閒同你講規則？使唔使紥手帶拳套？唔會架嘛。打交就係打交，扯頭髮係基本，但MMA唔得；有架餐可以照用，不論係手袋定係士巴拿，但MMA唔得；街頭打交唔限人數，所以先會出現「大混戰」，但絕大部份MMA比賽都係一個打一個，隻揪隻，無團戰，更加無混戰（除咗個別賽會有搞五打五）。咁點解街頭打交又要寫成係MMA呢？

濫用專有名詞不代表專業

由此可見，MMA本身就係有特別指明某一種運動，而唔係打交。情況就好似一開頭咁講，交通意外，撞車，你唔識就會話撞車，詳細小小可以講係乜車撞乜車，可能係私家車撞的士，小巴撞巴士，等等。如果交通意外本身涉及一部好特別嘅車，又或者好出名嘅品牌，例如林寶堅尼，波子911等，咁你先會係報導標明「911直撞271巴士」又或者「的士小巴對頭撼」之類，但係新聞嘅基本原則係報導事實，一部巴士同小巴相撞，你唔會寫「私家車撞的士」，更加唔會寫成「林寶堅尼撞波子」，咁點解同樣只係街頭打交，無規則無技術，甚至連當事人都隨時唔知乜嘢係MMA，報導標題可以寫成「街頭MMA」？

打交就係打交，除非你好明顯見到佢有用得上MMA常見技術，又或者事件主角真係學過MMA，你可以咁樣去寫去報。但係連交都唔識打嘅閒人，先而口角繼而動武，扭埋一舊就話人哋係MMA？先唔講呢件事係唔係太搞笑，又或者突顯記者唔識字，而係連報導事實都稱唔上！

打交，搏鬥，扭打，混戰，對打，毆鬥，襲擊，企圖謀殺，全部都可以形容打交，係唔明點解硬係要寫MMA，都唔話你中文報導係要寫英文，更重要係根本上寫錯嘢吖嘛！唔識唔緊要，但唔好濫用一啲唔識嘅字，因為咁樣其實好好笑。