【室內設計】增加家居精緻感的3個小技巧

好多人喺重新裝修嘅時候，定咗家居風格之後，都諗唔到屋企嘅細節位要點做。究竟點樣設計，先可以令整體嘅精緻感加分呢？又或者可以點做，先可以令整體更加設計感？今次就教大家幾個小技巧，可以令成間屋望落去更加好睇，亦都更加精緻啦！

(1) 運用特色牆設計

特色牆係近年香港裝修嘅流行元素，因為特色牆可以提升家居風格，點亮整體設計。無論係客廳、睡房、甚至係走廊，都可以加入特色牆設計。所以如果想翻新屋企嘅時候，都可以嘗試一下運用唔同材質，營造唔同風格嘅特色牆。而且呢個亦都係一個比較慳錢嘅做法，去令到成間屋更加有特色。

但係特色牆嘅款式眾多，究竟邊一款先最適合你？近年香港好流行用藝術漆特色牆，因為款式比較多，亦都可以增加質感。油起上嚟有少少工業風感覺，令人覺得家居更為型格。如果屋企風格較為簡單典雅，就可以嘗試使用雲石紋路嘅特色牆，因為表面光滑，顏色上主要以淡色為主，咁可以增加奢華感，令家居設計不失氣派。

（2）使用趟門或隱藏門

因為香港唔少單位都比較細，所以門身嘅選擇就更為重要。好多人喺設計嘅時候，都會將一啲門改為趟門設計，咁就可以慳返個開門位。而且唔少嘅趟門都極為有風格，例如上方加入金屬設計，就可以有一種工業味道。如果係加入日式和紙設計，就有一種和風無印感覺。所以大家可以視乎自己室內嘅感覺，揀選合適嘅趟門。而隱藏門即係將門身設計融入單位設計當中，例如有人會將書房門變成書櫃，又或者可以融入收納櫃當中，就可以令設計更統一。

（3）向上向下發展 增加收納空間 

如果你係好鍾意買嘢嘅人，或者係好鍾意收藏唔同物品，屋企嘅收納空間就要做得更好，咁先可以避免單位令人感覺壓迫。而且香港實在太多細單位，唔係好知道點做收納空間，啲嘢擺埋擺埋就會拎到屋企好亂，無咗個設計感。所以大家喺裝修屋企嘅時候，可以嘗試向上或者向下發展收納空間。

如果樓底比較高，可以嘗試做閣樓，或者訂做入牆櫃。將平時少用嘅物品放上去，就可以令屋企更為整潔。如果樓底唔太高嘅話，都可以訂做地台。而家香港都十分之流行地台設計，因為有少少日式感覺之餘，又可以增加到室內嘅收納空間。無論係客廳定睡房，呢個設計都好受歡迎，而且地台設計令人有一種休閒感覺，返到屋企休息都更加舒適。