【室內設計】時下流行的5種家居風格

如果想令屋企更加有設計感，就要令成間屋嘅風格統一。但有咁多種唔同嘅style，究竟邊一種先適合你？同埋啱你心水呢？以下幫你整理咗幾款流行嘅風格，總有一種啱你嘅！

（1）北歐風格

主張運用自然嘅原木作為建材，營造一種溫暖嘅感覺，帶出實用又明亮嘅空間。顏色上較為素雅，愛用自然色系作為基調，例如係：白色、米色、淺藍色、木色、灰色、湖水綠色。而且配合開放式裝修格局，開放式廚房設計就係常用的設計方式，特別慳位實用，適用於香港小單位蝸居設計。可以有效增加採光，又可以減少隔間帶來嘅壓逼感，令空間感覺更闊落。

（2）日式無印風

日式無印風講求自然簡約，盡量採用自然光源，亦可以運用木製家具，呈現木材嘅柔和、光澤感覺，令屋企增加暖和感。同時避免使用金屬材質，以及過於花巧嘅設計。選材方面建議揀選：竹子、石板、榻榻米、玻璃、梧桐木等等。就可以較容易呈現日本風格講求同大自然共存嘅意念。門身方面可以利用日式趟門，增加和風感覺。

（3）工業風

工業風係一種模仿工廠、倉庫嘅裝修風格，以實用性為主。牆壁、地板常展露出建材原貌，例如可以運用大片幅嘅仿清水泥牆身、天花，亦可以以原木風味嘅地板及傢俬，形成工業風格獨有嘅粗糙趣味同美感。顏色方面，黑、白、灰係工業風嘅基調，可以互相配搭，為家居製造層次和對比。

（4）輕式奢華風

輕式奢華風係通過精緻而不失高檔嘅軟裝元素，而凸顯家居質感，令單調空間顯得更有品味。所以設計上著重細節，例如：紋理自然嘅大理石元素、有光澤嘅金屬、鏡面、黑鋼材質等等，增加精緻感。同時亦要摒棄過度華麗嘅裝飾，創造奢雅嘅感覺。需要有高級嘅生活品味，又要有低調嘅簡約感。配色上可以考慮黑白灰、暖調奶咖色、米杏色、、象牙白、原木色。

（5）簡約風

Less is more嘅裝修風格，即係減去不必要嘅繁複，唔做華麗裝潢，回歸設計本質。所以設計上大多以淺色、大地色為主，較少有其它花俏配色。家具上可以實木家具為主，可以呼應主色設計，又可以令家裡多一份溫暖感。牆面就可留白，用簡潔造型展現視覺感，令室內空間寬敞通透，帶出無壓舒適感，呈現溫馨居家自然感。