【蝸居攻略】教你5招增大室內空間設計小技巧

香港地小人多已經唔係咩新鮮事，啲樓愈起愈細，唔花多啲心機都唔得啊！雖然大部份單位都係小空間，但我地都可以利用一啲小技巧去放大室內空間，令成個視覺效果比實際更加闊落。以下嘅設計方式，可以減輕小單位帶嚟嘅壓迫感，令室內更加明亮，一齊學吓啦！

1. 盡量使用淺色作主色調

如果用深色油漆好容易會吸收光線，造成視覺暗角，令視野空間更細。所以一啲細單位盡量可以使用淺色系嘅油漆顏色，咁就可以有效反射室內光，同埋自然光線，放大視覺感覺。主牆身用淺色系，特色牆亦可同時使用淺色，例如：灰白色、淺藍色、淺綠色，等等。運用色彩減少對比度，又可以令空睇落更明亮，視覺上更柔和，又有設計特色。

2. 運用簡約設計風格

你諗下如果屋企周圍都有好多擺設，成屋都係嘢，一定會令人眼花繚亂，完全唔覺得有位行。所以要盡可能令室內保持乾淨、簡約，學識斷捨離，唔好儲過多嘅雜物，騰出嚟嘅地方就可以變成生活空間，多咗地方用之餘，又可以令室內環境更為整潔，仲可以令空間睇落更大添。如果你想加入室內飾品，例如掛畫、地顫，都要盡量揀選一啲size較細，唔會阻礙你視線嘅飾品喇！

3. 善用燈光效果

燈光設計影響單位嘅空間觀感，除咗頭先提到可以用淺色牆身令屋企更光亮、更寬敞之外，仲可以增加室內燈光，例如喺櫃頂、櫃底等嘅地方加入燈帶滲光設計，拉高樓底觀感，既可以增加空間感，又可以帶出設計品味，擴闊視覺空間。而且好多單位樓底都唔高，所以天花燈可以選擇一啲吸頂燈，唔好用吊燈，會令空間更為壓逼。所以要小心選擇燈具啊。

4. 加入鏡面設計元素 

鏡面元素可以使人產生空間延伸嘅錯覺，製造視覺假象，而且鏡子可以有效反射光源，令室內更光亮。所以可以喺狹小，同埋採光不足嘅地方放置鏡面，可以彌補空間缺陷。如果唔想用鏡，都可考慮運用鏡面嘅櫃身，都可以達到同一個效果。但係如果你重視屋企風水嘅話，最好事前查詢風水師傅意見。

5. 利用多功能家具、變形家具減少傢俬數目

而家唔同牌子都出左唔同類型嘅多功能家具，可以喺在發揮傢俬嘅功能之外，更最大程度節省空間。例如係一啲摺疊家具，將幾樣家具結合，其實都有少少似俄羅斯娃娃，可以非常節省空間，一物多用，所以多功能家具，或者係變形家具都十分受小家庭歡迎！