健力動作VS舉重動作，究竟各自有乜用，又應該點樣用？

入健身室做運動，只要涉及槓鈴訓練，就會不期然分咗兩大派出嚟，一種係專練「健力三寶」，另一種就玩「奧運式舉重」。兩種動作都用大重量，但偏偏做出嚟個樣似同非同，究竟邊樣好啲，邊樣又啱你玩多啲？

健力與舉重

一般而言，健力動作主要講三大動作，分別為深蹲，硬拉同卧推。傳統訓練嚟講，「健力三寶」可以話係訓練動作既皇牌，入健身室只要圍繞嚟三個動作嚟練，基本上已經符合咗絕大部份既運動需求。

舉重動作，一般指奧運式舉重入邊既兩個比賽項目，即係抓舉同挺舉，又圍繞兩個動作延伸出其他動作，都屬於舉重式訓練。特別係近年既舉重知識普及咗，越嚟越多人會嘗試用舉重式訓練作為訓練既主要項目。

咁係咪新興既潮流一定好過傳統呢？又，其實各自練緊啲乜呢？

發力的不同

兩套訓練最大既分別，在於發力嚟講兩套動作有著好明顯既分別，就係發力既時間。

健力動作，一般可以用較長時間發力，不過，所謂「較長」，其實都係比較，因為相比之下，舉重動作係唔可以拉長個發力時間，一下就要做到，做唔到就係做唔到。

呢個情況正正都係兩套動作所訓練既最大分別：爆發力。

所謂既爆發力，學術啲講即係神經系統召集肌肉參與動作既時間，爆發力越高，就係神經肌統召集肌肉發力既時間越短（即係越快）。舉重動作最明顯既技巧，就係快。

相對於深蹲硬拉，兩者都可以用一個較慢既速度完成，唔需要下下（更甚至唔建議）用好快既速度去做完一個動作。健力動作最大既重點，在於同時間令盡量多既肌肉去參與動作，因此即使只係主力訓練健力動作，依然可以有效令全身既肌肉都有參與訓練，而唔會太過孤立地只練咗某部份肌肉。

二揀其一？實際上缺一不可

所以係訓練上，係咪代表兩樣只應揀一樣？好明顯既答案就唔係，更重要既係，其實兩套動作都應該要練，只係基於你既訓練需要，偏向練邊一樣嘢多啲。

健力動作有效令全身肌肉參與訓練，但問題係佢無逼使你既肌肉需要快速，短時間內收縮用力。因此，如果係面對一啲突發情況時，需要突然用力既效果就會較弱。

但係，單純針對舉重動作做訓練，雖然可以提升爆發力，但爆發力既前提，係需要有肌肉去支持。即係你可以好短時間去好多肌肉發力，但係好多肌肉都無乜力嚟講，加埋一齊都唔顯得特別大力。

一般既爆發力訓練，都係以提升肌力為前提，以舉重動作為終點。所以如果真係想訓練舉重動作，其實都唔可以避免用健力動作做訓練。而只係訓練健力動作，就未必有效令訓練效果提升為其他運動效果，特別係需要跑同跳既運動。

你呢？你又點解需要做運動？