做運動只係計算卡路里就夠？你必須要知既唔同類型運動對你運動有乜效果分別！ - Owen＠taekwondowen

如果你既運動目標係諗住修身，相信你都會聽過，運動既目標需要達致幾多幾多既卡路里消耗，先算得上符合幾多幾多既目標等等。問題嚟啦，如果單純淨係睇個數字，係咪就代表咗運動效果呢？如果你心入邊既諗法係似係又似唔係，以下既分析應該幫到你。

健身室係唔同類型既帶氧訓練器材，咁跑步同划艇有乜分別呢？假設兩樣運動做既時間一樣，心跳率一樣，消耗卡路里一樣，咁兩種運動係咪會有同樣效果呢？

跑步，站姿開始既運動，用既肌肉力量需要承擔全身體重；划艇，坐姿開始既運動，係咪代表舒服啲運動量會低啲呢？但係一般嚟講，跑步機既數量多數都多過划艇機，係咪代表划艇機相對無乜用？

如果今日只係考慮卡路里消耗，事實上，兩部機既效果真係無乜大分別。事關卡路里消耗就係一個單純既數字遊戲，減咗就係減咗，有減就係有減。當運動目標只係消耗卡路里嚟講，其實真係揀邊個都得，咁但係點解大家會傾向揀跑步機而唔係划艇機呢？

舒服啲，可能係唔少人既理由。

事實上，划艇機雖然係坐係度開始既運動，但當你真係玩過既時候，其實划艇呢個動作一啲都唔輕鬆。而且涉及既技術比起跑步多，起碼跑步好似人人都識，但划艇就唔一定啦。

但唔係話消耗卡路里一樣架咩？咁點解有一樣辛苦啲，一樣無咁辛苦？

好明顯既答案，就係運動型式唔同。

划艇機會比較攰既原因，係因為划艇用到既肌肉可能好多人係日常生活都無乜點用，所以顯得個啲肌肉要用力既時候就較為辛苦。由此可見，當你揀一樣運動去做既時候，就算目標只係消耗卡路里，其實係呢個數字既背後仲有唔同既結果會出咗嚟。

點解同樣都係跑步，同樣都係跑咁多時間，但一般嚟計跑街會比用跑步機消耗更多？因為跑街用到既肌肉同跑跑步機唔同好多。事關街既情境會有唔同既高低起伏，地面軟硬等等，導致個人需要既發力會唔同咗，再加上，跑步機係一部輔助器材，佢一邊郁，幫緊你郁，即係就算係同樣一個跑步動作，你既力量都會用少咗。

同樣道理，即使只係消耗卡路里，你既動作唔同，就代表你需要用到既肌肉唔同。又正如上文提過，因為划艇用既力係大部份都市人平日少用既肌肉力量，所以會覺得更辛苦。

既然係咁，當有時間做運動既時候，如果可以練埋一啲平日無練既嘢，又可以達到同樣卡路里消耗既話，係訓練上邊係咪一舉兩得呢？

話返轉頭，點解你會諗住做運動係為咗消耗卡路里？

或者係身體健康，或者係修身減脂，做運動最基本既原因，就係要令你個人由無乜郁變成郁返多啲。不論係為咗健康或者修身，其實點樣做運動都對於你成個運動效果有好大既影響。例如用既肌肉群組唔同，就已經影響緊你整體既肌肉量會唔會更易更快流失。

要知道，人體既肌肉生長原則就係「用進廢退」，即係話，用得多既肌肉會留低，用得少既肌肉會消減。會有呢個結果，係因為肌肉流失係人體成長過程當中必然會出然既情況，不過，亦都係因為「用進廢退」既原因，如果你能夠持續做運動，持續令肌肉參與，其實肌肉都會有所保留，甚至增長。

健康係健康，瘦係瘦。訓係張床唔郁一個月，淨係吊鹽水，一樣生存到，一樣會「瘦」，呢個係咪修身既理想目標？健康既目標，就係起碼令個人有力去做想做既事。如果本身已經少做運動，或者係好難得先有時間做運動，咁就應該諗下有乜運動可以令自己健康更有幫助。

例如以帶氧運動嚟計，划艇可以大幅活躍你平日少用既肌肉，雖然做完全全身更痛，但係呢種效果或者先會喚醒返你做運動既基本目標。「No Pain No Gain」呢句說話用係運動上就最直接：訓練後既痠痛，其實係賺取緊你既肌肉成長。