JPEG 偽直出 @ 草根散記

有啲人以為唔做後製，JPEG 直出就係原汁原味，其實當中有不少並不美麗的誤會。

首先，曾經用過多於一部相機的人都會知道，同樣光圏、快門、ISO、焦距，拍攝同一景物，使用不同相機得出的影像，分別可以好大。因為所有拍攝完成見得到的影像，都係經過相機的內部處理而成，而處理手法，卻是不盡相同。換言之，同是乾炒牛河一碟，不同的相機，會用不同的豉油，整出不同的汁，根本就冇絕對的原汁。廠商永遠話你知，新型號的豉油好味過舊型號。

相機唔問過你自把自為落調味，並不一定係為咗靚，亦會係因為原材料有啲缺憾。例如，落幾片薑，就係要辟走啲腥味。早期啲數碼相機，感光元件未夠先進，又多數設有低通濾鏡，影出的原影像反差不足，亦比較朦，所以必定略加反差稍加銳化才示之以人。請問，此汁此味何原之有？其實何只咁，唔怕話你知，每幅照片最原始的影像數據，若不經處理，跟本唔見得人，情況就有如未曾煮熟的一碟餸。之所以叫做 RAW，不無原因。

其次，一啲 JPEG 與其話係直出，不如話係「預設簡單後製方案影咗之後唔該照單整好先上枱」。例如拍攝之前選定風景模式，調較色溫、設好落幾重手 D-Lighting，然後撳快門，「叱咤」一聲 ...... 直出？錯！錯！錯！

實情係 CMOS 感光、訊號放大、經廠商引以為傲的乜乜物物影像處理器作基本處理，運算出影像數據之後，就係連串你以為唔係後製的後製，包括你選用乜嘢色彩空間，Adobe RGB 定 sRGB，當然亦唔少得閣下預先講咗話唔當係後製的一堆後製設定。搞掂晒，先至轉成可見影像俾閣下欣賞。

數碼相機影像處理示意圖

其實，除咗整個成像過程係偽直出 (pseudo direct output) 之外，「直出」的影像，觀感亦不一定比有編修的更貼近現場所見。原因係一般人睇景，唔係好似相機咁一下子將眼前影像化作平面照單全收，而係眼光同注意力會在場景中的各個部位遊走，作出「主觀掃瞄」。呢種主觀掃瞄的一大特徵，就係「擇善固執」，即係話，按照自己認為啱睇的觀感執出嚟。以下面的附圖為例，天空的雲霞係靚嘅，人物面孔五官，以及右面啲雜物係清楚嘅。可惜，喺光差強烈情況下，相機的一次曝光係冇辦法可以如「實」報導，反而經過適度後製，才更接近現場觀感上的「實」。

JPEG 「偽直出」

後製「真觀感」

以上所說的「實」，當然並非物理上的實在，而是感覺上的實在。若然有人認為感覺上的實在不比物理上的來得重要，不妨試試於不大炎熱的日子，淋濕全身，然後走到強風之中感受一下體感溫度的滋味。