出去玩水就唔怕中暑？首先要搞清楚中暑係乜嘢一回事啊

係熱天做運動，又或者係戶外工作，其中最大既敵人就係天氣。近排熱既天氣多咗，唔少人就諗住去游水消暑，但係又有無諗過，其實就係身處係玩水既地方，一樣都有中暑既風險，甚至風險係更高呢？

話說回頭，中暑本身係啲乜？

中暑，簡單嚟講就係人體對於天氣既既反應，反應唔到，出現失調既情況，即係假設你個人係一部電話，依家你部電話熱得濟，咁就會用唔到。

實際上，人體面對熱既情況，就會嘗試透過自己既機制去保護自己，令你個人唔會咁熱，等你可以維持運作等等。電腦如果熱，部風扇就會郁大力啲，郁快啲，令溫度降低，所以電腦如果熱個陣，你會明顯聽到風扇聲快咗響咗。但人體自己無風扇，咁點算呢？人體就會透過呼吸同排汗，從而降低自己體內既溫度，等個人仲可以運作。

而同中暑相關既問題亦都係咁樣出現。

首先你個人熱，就會透過呼吸同排汗機制去降溫。咁你個人越嚟越熱，就會加速呼吸同排汗，正如電腦部風扇一樣。問題係，呼吸同排汗過快過多，同樣都係會令你生命有危險既情況。

呼吸過急既話，其實抖唔到氣既表現，而人體功能係需要氧氣去運作，當呼吸急促，即係氧氣不足，咁就會令個人更難去運作，最明顯影響就係頭暈頭痛。所以熱到個人覺得頭痛，其實都可能會連帶住頭暈出現，呢個時候就需要休息一下啦。

而出汗過多呢，其實係一個更嚴重既情況。首先，一個人如果水份不足，其實會大幅降低整個人既運作能力，要知道身體入邊唔同既功能都需要水份，包括血液輸送氧氣去身體唔同部位，正如上一段提過，如果氧氣唔夠，人就會容易郁唔到。而血唔夠既話，即係連肌肉既收縮功能都會變差，因為血液輸送唔切去相關需要運動既肌肉到，咁會點呢？就會出現抽筋同痙攣等症狀啦。

咁點解玩水會更易有呢個問題？

事關當你個人游水個陣，你以為自己無乜出過汗，實際上其實你個人一郁，身體內部既溫度就會上升，當溫度上升，就自然會排汗。而近年更多情況，係大家去玩水個陣，根本唔止係游水，而係玩以水為主題既唔同運動，例如滑水等等，本身就唔係係水入邊做運動，即係水係無太多幫到個人降溫。咁出咗汗之後跳一跳落水就當無事，其實係忽視咗呢個安全風險。

最簡單既諗法，就係個人無水，就去飲水而唔係浸水。因為出汗係體內既事，飲水係補充身入邊既水份，浸水只係令你個人無咁熱，但流失咗既水份一樣都係流失咗。如果只係諗住降咗溫就無事，咁就真係大件事。

所以當大家夏天會出戶外玩既時候，一定要飲多啲水，留意自己有無頭暈眼花，一有唔舒服就記得休息啦！

衛生署防中暑簡介：https://www.chp.gov.hk/tc/static/90064.html