你估唔到！營養師都會教你用既「相機食先」修身法！

唔少人會笑話，點解食飯前要先影相，係想收保護費？定係覺得自己好似偉大一樣咁重要？非也，實際上，用相機影低自己食乜，除咗可以係萬一發生咩事食物中毒無故身亡既時候作為證物之外，更重要係可以幫到唔少人都想要既目標：減肥。

無錯，相機食先的而且確係一種減肥方法，更甚至係營養師都會叫你用既減肥方法！

點先為之「相機食先」減肥法？

固名思義，食乜嘢都要拎部相機出嚟影相先為之「相機食先」，講就簡單，但有幾個要求必須要做到。

1）誠實：每一樣放入口食既嘢都要影一張相，係每！一！樣！

不論係正餐定零食，白飯定白兔糖，食幾多影幾多，每一次都要影咗先放落口。

2）公開：相機食先既另一個重點，係要話比人知！

你影底既相如果自己收收埋埋就無乜意思，無人知你影咗乜，亦無人可以幫到你。就算唔想完全公開比人睇，都應該要比你既營養師／教練／親戚朋友兄弟閨蜜睇，咁先有人督促你！

3）檢視：當影完一日相，自己重溫返影咗啲乜，呢步先係最緊要！

實際上，「相機食先」既最大功用，就係令自己可以重新睇下自己全日嚟講究竟放咗啲乜嘢入口。睇返啲相，就算數字唔完全準確，都大約可以睇到究竟食咗幾多脂肪碳水蛋白質！

修身第一步：計算卡路里！

事實上，任何修身方法都好，不論增重或減磅，想要有效率，首先應該要先計一計卡路里。

你需要知道既係，究竟你一日會大約消耗幾多卡路里？又，你一日又會食咗幾多卡路里？如果你想增重既話，你食既應該要比消耗更加多，如果你一直食極都唔夠，咁就唔會增得到；相反，如果你想減重既，你食既就應該要比消耗少。當然，如果你想唔調整飲食既話，亦可以考慮增加運動量嚟提升運動消耗，一樣可以減到重！

另一方面，除咗單純既熱量數字之外，更加重要既係你一日入邊食既餐單，究竟點樣分佈營養素呢？2000卡既脂肪同2000卡既蛋白質，唔會話邊個肥啲瘦啲（因為一樣都係2000卡），但係你都會感受到有好明顯分別！所以，當知道咗自己一日所需要既卡路里後，就要睇下自己有無好好分配唔同既營養比你自己！

唔知點計？不妨上嚟我個人網站有個免費既熱量計算器隨便你用。

熱量計算器：

https://taekwondowen.com/2021/12/29/%e6%af%8f%e6%97%a5%e7%87%9f%e9%a4%8a%e5%90%b8%e6%94%b6%e5%88%86%e4%bd%88/

社群支持亦係成功重點

而近年亦會經常見到，唔少人會開一個IG專門貼自己既食物相，到底有乜用呢？其實都係屬於「相機食先」減肥法既概念。

除咗話影低啲相可以比自己睇返自己食咗啲乜，更重要係比人地都睇到你食咗啲乜。如果你既目標係減肥，當你既相片入邊似乎吸收太多卡路里，相信你身邊既人見到都會不禁問一句：「食呢啲真係得？」

當有人比咁既評價時，第一個反應千祈唔好嬲，應該要諗下點解人地會咁問？純粹口痕搏虎先問吖？定係真心關心你既健康先問呢？

而且，如果你會在意自己影既相靚唔靚，其實同時間都會提升緊你既食物質素。當你為咗整得靚靚比人睇，又同時顧全唔可以比人話既時候，你就會細心諗下一餐食乜好，又應該食啲乜先會令人覺得「哇，比心機」，甚至係「我都想跟住食呢啲」。

呢啲支持同鼓勵，其實都係減肥修身既重要動力。

最難就係堅持！

其實點講都好，所有方法都有用，唯獨是你可以堅持幾耐？

要記住，每一餐都堅持影相，其實一點都唔易，如果你能夠做到連一杯水都影相，堅持到咁極緻，你成功既機會又會再大一啲。透過公開自己既目標，身邊社群既支持，其實都係令自己堅持落去既能力。

所以，就算係「相機食先」呢種聽落咁奇怪既方法，如果你堅持到，其實都係一個非常有效既方法。

比心機！

（撰文：鍾禮賢師範，專項研究武術的運動教練。國際跆拳道聯盟國際教練，黑帶五段師範，多年來熱心於研究跆拳道的歷史和技術，透過運學科學實踐驗證，為融合武術與運動科學而努力。）