《環保》♻️回收你響應嗎？

垃圾分類、乾淨回收。。

回收已經做咗一年嘅時間，差不多可以話係風雨不改，習慣每一至兩星期點都會去一去616（綠在區區）。可惜第五波疫情失控，我的回收工夫也被迫暫停。而6店也為了減少與人接觸機會而暫停了一貫可以磅重、儲分、兌換禮物等安排，直到3月尾。為安全起見，只好暫停⋯⋯（重申本人並非為了儲分而回收，而是喜歡紀錄一下自己回收的成果）

如此被迫停下來，多少都有不習慣。以往做垃圾分類，會留起好多產品包裝的廢膠、紙盒、紙張，飲品食品的膠樽、鐵罐、玻璃樽、發泡膠、雞蛋盒、牛奶盒、粟米盒、生果網袋，甚至比較乾淨可以洗淨回收的外賣盒（若然太油的洗不乾淨回收不了仲花工夫所以唯有忍痛放棄），小型電器以至一條小小的壞了的叉電線、一粒釘書釘⋯⋯有好多其實係一般人以為不可以回收的物品，我都視之為珍寶的「回收物」，而不是一般人眼中的「垃圾」。

我的回收歷程，喜與悲。。

最初發現垃圾分類係見到一位朋友分享，先知道原來有咁樣嘅機構咁樣嘅回收方法，從而開始了解、學習、嘗試。唔做由自可，一做把幾火！好快好快竟然儲咗兩三大袋！原來一個家庭三幾日可以累積咁多「可回收垃圾」🥲，而真正不可回收的「真垃圾」係可以得返好細袋！證明我哋曾經掉過幾咁多可以重用嘅有用資源？（😭😭為地球心痛……）

當發現這情況我就開始的起心肝做回收，可惜唔係人人理解，唔好話識得欣賞你咁高尚，更加有人黑心到同你唱反調，背後做盡小動作，你執佢就專登掉！其實真係好心傷，小小事情看穿人心。還好，感恩凡事有兩面，另一邊廂我又得到好多朋友鼓勵同支持，也成功影響到一些朋友齊齊開始做回收，見到佢哋都一齊分享出去，我都心感安慰，開心返啦。

政府已公佈未來會收取垃圾徵費，也一直推行垃圾分類。撇除一些唔做分類的人，好多人都對三色分類筒冇信心，也有人講分類筒最終都係攞去堆田。我哋清潔得咁辛苦得來的乾淨回收物，真係唔捨得掉三色筒。所以寧願辛苦啲行遠啲都好，點都要安排攞去回收店，真心想啲回收物有個好歸宿。佢哋能夠回收再造，我哋啲綿力先唔會白費。

朋友，希望你都一齊加油！救救地球！