【市集攻略】人流靠搞手，留人靠檔口
場勝將軍
2022年2月16日
作為市集搞手一段時間的我，不論個場搞得幾成功都好，都總會聽到有檔主發表以下言論：「個場都無人流」、「搞手【零】宣傳囉」、「好靜囉，都做唔到生意」等等。當然呢番說話佢地唔會係當面同你講，通常都係事後會記得自己公司名出現係各大社交平台市集交流群內，先知發生咩事。
首先，作為搞手都試過有失手的時候。有些場地真係未必每個搞手都駕馭得到，我地都試過中招，人流試過強差人意。不過我地發覺好多時候，其實係有人流的。我地每次搞市集都會安排Helper妹妹係入口計人流，都可以同大家分享下數據。一般情況，以一個20-30檔的市集而言，每小時都有100-200人進入市集。即平均而言，每小時每檔都有4-8位客人可以Serve。咁點解會有檔主會做唔到生意架呢？問題唔係「人流」而係「留人」。
大學讀Marketing個陣學過一個Theory：AIDA。搞手就好似Sales Funnel入面既第一個(A)，我地作用係Awareness引起外界注意進入我地市集。入黎之後，就要諗引起客戶興趣Interest (I) ，繼以誘發佢地既慾望Desire (D)，從而促使佢地盡快Take Action (A) 成交。後面既IDA其實就要靠檔主既【留人】功力啦。
搞手不是二房東
不時都收到有朋友講話想做市集搞手，不過我通常都潑佢地冷水。因為搞手唔係一個【二房東】低價租入，高價分拆租出就可以。如果抱住呢個想法，我勸佢都係唔好入行啦。做搞手其實係一個多功能角色，集PR、Marketing、Event Management、心理輔導員同打雜既角色之一。其中一個好關鍵就係要識得做宣傳帶人流。
作為搞手通常會係幾方面著手去帶動人流: 1) 選址、2)主題、3)活動配套、4)線上推廣以及5)線下推廣。今次篇幅有限就唔講入面細節，作為檔主可以呢5方面去衡量搞手做唔做到野啦。下次預一篇文章詳細講下我地平時搞市集有咩事前準備。
動態留人
搞手為市集帶到人流後，接住就係考檔主功力點樣【留人】。首先，最重要引起興趣 (I)。呢方面張枱擺盤裝飾係好重要，最基本係要夠立體，有需要帶1-2個層架將貨品有層次咁疊高；另外，燈光都非常重要，因為打燈打得夠，產品會呈現得更靚。不過有時候場地燈光未必足夠，所以穩陣起見要自備射燈。
第二，製造羊群心理。正所謂瘦田無人耕，耕開有人爭。只要有人埋枱睇野，自然有人好奇走去睇。盡量將客人留枱時間延長，呢方面檔主既親和力好重要，令客人願意留低同你傾計。睇野可以幾秒就睇完，講野可以講一日都講唔完。另外，可以適當地為自己檔【造勢】。有時候叫朋友黎探下你，為自己檔口創造人氣。有幾個人圍住張枱，其他人見到有人氣都會被吸埋去。另外創造互動、小遊戲都不失為一個留人好方法，將埋枱既人逗留時間延長。其實，市集係一個眼球既戰場，如何將游走既眼球吸到自己檔口，就係你【留人】既功力啦。
搞手同檔主係一個互補既角色，並不是對立。一個成功既市集係兩者一同協力各盡本分去完成。網上意見可以參考，但自己經驗才是最真實。人地產品賣唔到，唔代表你產品唔得，反之亦然。最後，重要說話講多一次：「人流靠搞手，留人靠檔口」，一起進步吧！
筆者: 場勝將軍
其他相關文章: