新年運動身體好！凍凍天氣做運動要小心唔好冷親啊！

新年緊係由做運動開始！但係近日天氣轉凍，係咪就唔可以再做運動？唔係！天氣寒冷不及人懶！只要你唔懶！再冷都唔係理由令你拒絕運動！但當然，係天寒地凍既日子，做運動當然由做好熱身開始！

要好好咁做運動，當然要做好熱身，特別係天氣凍既日子，你個人既身心狀態都係處於保暖多過郁既傾向。所以，係天氣凍既時候更加要注意做好熱身，但係好既熱身應該要點做，又應該包含啲乜呢？

首先，你要確定一下你做既運動係啲乜先。不論用眼睇定用腦諗，你都要比自己心理狀態知道，嚟緊即將做運動，又即將會做啲乜嘢運動。當中包括你會做乜嘢既動作？需要用幾大幅度既去郁？有啲乜嘢特別既突發情況你要準備埋？由心理狀態開始令自己有一個感覺去做好運動，咁你就已經做好咗熱身既第一步。

其次，如果你已經知道即將會做既運動係點，就直接開始啦！不過唔係一嚟就由最高強度去做，你可以將嚟緊既動作由慢至快，由易至難咁慢慢逐步做上去。跑步既可以跑慢啲，深蹲可以慢慢深，但要蹲深啲。令自己既身體可以隨時準備去做唔同角度既動作，咁你就自然可以令嚟緊要郁既身體部位都感受到準備要投入工作啦。

但係熱身點先叫做熱得好呢？書本教既，就話要令個人體內溫度提升，血管擴張，但我好地地點知道自己係咪已經達到適當水平？所以最直接既方法，就係嘗試做一啲嚟緊就要做既動作，特別係一啲突如其來既高強度動作，例如一啲急停，轉向，又或者H.I.I.T.既頻率先做幾下，令自己感受一下係咪真係做得到先。如果呢個時候已經喘氣，咁就證明個熱身未夠啦。

要令計劃成功，一個好既開頭至關重要，所以要令自己新一年既運動計劃做得好，就一定要由好既熱身開始做起啦！