雲妮變強妮（一）：乜嘢係功夫？

話說有一日，雲妮係發現自己訓咗係醫院。「點解呢？」雲妮諗咗一陣，終於記得返。「就係因為我無學功夫？」

 

事關點解雲妮會入咗醫院呢？作為一個普普通通既Office Lady，當然人生就無乜特別目標，儲儲埋埋啲錢無嘢做就拎去買Hermes。佢自己就緊係覺得自己平平凡凡，普普通通，但係係賊人眼入邊又點會咁諗呢？哇，個袋拎去咪攔站都賣到幾皮嘢架喎，你又咁纖瘦薄弱，唔搶你搶邊個啊？於是，有一日，雲妮就比人當街搶手袋。

 

人生都無乜目標既雲妮，辛辛苦苦買返嚟既Hermes咁易比你搶架咩？緊係搏條後生命都同你死過，不過，弱肉就緊係強食，係佢出盡力係度打打打咁打人手板個陣，人地一下打埋塊面度，佢就暈咗，醒返，就係醫院啦。

 

「咁我應該學乜功夫好？」身為屋企收埋十幾廿個Hermes袋既雲妮，當然唔會就咁就以後唔拎啲袋出街，咁點算呢？即係總會有下一次比人打同打劫架喎，為咗保護自己，於是乎，佢就走咗去睇究竟應該學乜功夫好啦。

 

話時話，其實功夫，Kung-Fu，又唔係淨係關打交事。著名大導演王家衛就曾經講過，「功夫就係將一件事重覆做到極緻」，所以功夫又唔係淨係可以用嚟講打交。如果我地好認真咁去探討，乜嘢係功夫既話，就應該用「武術」，Martial Arts去思考一下，究竟乜嘢先係武術。

 

其實小至細胞大至國家，同人類相關既生命體，幾乎都會有衝突。小朋友細細個連打交係乜都未知，一樣都會攬埋一舊，你扭下我，我撻下你咁。所以「打交」嚟講，其實係與生俱來既本能，唔係淨係人類識，係連動物都會識。

 

不過，人類叻就叻在識得將知識紀錄同保存，所以，所謂既「武術」，就係一把人將自己打交既經驗，打得好可以點保存，打得唔好可以點改進。好似雲妮咁，既然知道交就一定要打，打唔好既經驗就唯有儘量去彌補，難逃那煩惱，修修補補亂世中一起蒼老。

 

所以，武術其實本來就係一堆打交既技術，我地先唔好用甚麼門派啊，風格去分先，我地試下由武術既技術本身去分析，究竟乜嘢係功夫，乜嘢係武術呢？

 

武術有乜技術？

 

其實一般人類設計都係差唔多，兩隻手兩隻腳加個身加個頭上下，我地以運動嚟講，一般都係用四肢，即係兩隻手兩隻腳，所以打交嚟講多數都係用四肢為主既（咁當然都有人用頭用牙甚至用聲音添），先唔好計刀槍箭炮用武器既技術先，簡單嚟講，武術主要分三種技術。

 

第一種，站立技，企係度做既技術；第二種，地板技，跌咗落地，係地下同人打既技術。咁第三種係乜呢？第三種就介乎係中間，不過通常都係整人落地既技術，一般就稱為「摔撻技」。

 

「摔撻技」即係乜呢，其實令人跌落地嚟講，都分兩種技術：一種就係用力拋人落地，通常叫「撻」，另一種就係令人企唔穩跌落地，通常叫「摔」。

 

你可能會問，都係落地啫，有乜分別呢？其實係完全兩套唔同出發點既技術嚟架。試諗下依家有人放咗盆桔係你門口，你想搬佢入屋或者搬走佢，都要諗方法搬吖，咁你會直接彎腰用力搬吖，定係搵嘢升起佢再搬呢？呢個時候你就會發現，明明都係搬郁一樣嘢，點解會有唔同方法呢，就係「摔」同「撻」既分別啦。

 

「摔撻技」係英文嚟講就係Throw and Take-Down。Throw，一般形容係柔道既摔法，就係主要借力去「摔人落地」，Take-Down，多數就係摔跤用既技巧，一係衝埋去捉人隻腳搬起人，一係就攬住人地個身轉人落地。

 

咁你好自然想問「喂唔係喎，柔道唔使用力架咩？」，唔係咁講，不過柔道本身既招就係要令人「企唔穩」先用得著既，試諗下，一個好有型既「背負投」，你睇佢好似拎住包米咁向前「撻人落地」，但其實「背負投」最理想既情況，並唔係用力升起你，而係令你企唔穩跌落我個背脊，再借力轉圈令你碌去前邊咁解。所以一般嚟講，柔道招要成功用到，第一步就係要「破勢」，即係要令人失去平衡，開始想跌啦，然後先「幫佢跌」咁解架啫。

 

「好似好有型喎都。」雲妮係張床度攬住個枕頭左拋右拋咁，但係始終都解決唔到一個問題，「但人地係一巴車埋嚟，咁我應該點算呢？」下次我地就講下，究竟武術係點打人，同埋點唔比人打架呢。