同一斜路上（一）咩係Slasher Admin？(¬_¬)做左一個月Slasher想唔做

 

大家好，我係一個月前出過文，因為太多嘢想做，又未搵到長工，所以想做一個slasher，終於有時間做下定期報告；

 

「終於有時間，啫係好多工作啦。」

 

唔係，反而決定左做slasher後，jobsxx同indxxd多咗好多好長工，明明之前無嘅。好似街邊截的士咁，當伸手去截車時方圓十里都會無的士，放棄去坐其他車嘅時候的士大佬就會浦晒頭。當開始有一兩單小job佔據平日時間表，就唔可以做長工，洗濕個頭就硬住頭皮嘅情況。

 

「咁都唔洗咁快放棄啫，都叫有野做啊。」工作係有，但係自己嘅admin嘢都多。

 

Slasher Admin，啫係鎖碎事，例如接job時同客溝通、brainstrom、排時間表、屋企買咩零食……通通都係做slash嘅時候要費神嘅事。網絡上花花世界太多工作，係咪漁翁撒網咁申請晒呢？做邊啲好呢？……諗諗下，自己就喺comfort zone思考左一個鐘。諗返轉頭，長工就係自己專心做好自己分到嘅工作，但Slasher係自己晒全部工作，加上做唔好客人就唔會回頭，當中壓力都唔細。

 

「有幾難啊，手板眼見功夫啫。」唔係咁易㗎師傅。

 

例如人人都知道每日要飲8杯水，但做緊野嘅你係唔會想去茶水間湛水，就算你唔係喺度做緊咩重要野事，例如上網睇緊ig，都比鎖碎事重要，因為手板眼見嘅小事，可以拖嘅就拖左先，哩個係人嘅本性，都係我作為slasher要面對嘅自己嘅壞習慣。

 

哩個就係問題啦。每一個人都可以決定「自己跳出黎做」，但又係唔係適合出黎做呢？人人將「跳出comfort zone」放喺咀邊，又點先係跳得好零水花啊。

 

因為跳出comfort zone後，真正問題依加先開始浮面。

 

當然啦，我都冇諗住放棄學做一個slasher，跨過愈多高牆，自己可以做嘅嘢就愈多。Slasher同打工唔同嘅，開頭嘅停滯不前令我了解到，所謂時間管理唔止係管schedule book，而係對工作考慮，仲有Slasher Admin；接唔接、點處理、應酬客人、報告進度……唔好怕去面對手板眼見功夫，先係成為Slasher第一步。