《大叔的愛》裡嘅3種愛情觀，你屬於邊種？

《大叔的愛》裡嘅3種愛情觀，你屬於邊種？

12集播出後紙巾供應一度緊張，不過按照預告，睇嚟萬惡嘅編劇似乎唔打算放過大家。呢套劇明明以喜劇作定位，但慢慢卸去糖衣包裝後，包藏嘅喺一段又一段令人糾結嘅關係，從20年嘅謊言婚絪揭開故事序幕，入面嘅每段劇情都代表咗唔同嘅愛情哲學，以下盤點3個大叔的愛帶比我哋嘅愛情觀，睇睇你屬於邊種？。

 

1，渣渣田：「拖」到世界盡頭

面對中年同性已婚上司瘋狂追求，渣渣田採取「拖」字訣，冇直接拒絕之餘更加多次選擇逃避問題。後來被Francesca（簡慕華飾）逼做間碟，然後夾喺兩人中間，直到被大婆質問依然都喺唔敢面對問題，連呀牧都睇唔過眼，叫佢應該一早講清楚，渣渣田竟然回答：「我先喺受害者啊。」

呢場荒謬嘅三角關係，最大受害者當然喺Francesca，呀牧明，觀眾明，得呀田唔明。如果一開始同KK、或者Francesca講清楚，喺咪就避免咗呢場鬧劇，唔會越搞越麻煩繼續傷害其他人呢？

 

2，Francesca：豁達型

拎得起，放得低，講就易，但唔喺咁多人做到。同呀田相反，Francesca喺全套劇最成熟、最有智慧嘅女人，連PlayBoy Louis 都拜倒佢裙下。呢個女人不得了，面對KK提出離婚，果斷找出問題所在，到最後終於搵到自己一直追求緊嘅答案，依然坦然面對自己失婚，願意放手。

 

自己老公原來鐘意男人，20年來嘅婚姻原來喺一個大話，冇咩人類可以接受得到。前期Francesca為咗搵出小三，幾近瘋狂，威逼利誘跟蹤占卜樣樣齊，爭在未學隔離台咁出偵探玩埋爭身家。苦苦糾纏，終於纏到個''真相''返嚟，點知發現自己嘅20年青春喺一個天大嘅笑話。

 

正常女人唔喺三上吊就去咗睇心理醫生㗎啦，我哋嘅最強女角就當然唔會。最後佢坦然面對自己嘅失婚，唔再掙扎，選擇放手。其實成20年感情，邊可能就咁話擺低就擺低，邊可能無怨無恨呢？又或者，KK鐘意男人喺真，但佢對Francesca嘅感情唔代表喺假。咁多年來，KK一直遵守承諾，將Francesca當成''世上最幸福的女人''對待，明白到呢一點嘅Francesca，知道老公鐘意女人喺假，但對自己感情喺真，所以衷心感謝呢20年的陪伴，亦豁達放過自己。

 

3，大支牧：抽身斬纜止蝕型

呢套又名為《呀牧受難記》，上演咗呀牧花式360度被虐，被前任Hurt完到呀田個衰仔Hurt。牧呀牧，你真喺人如其名，以為自己喺碌木可以咩都頂得順、無所謂、攬晒上身？呀田個衰仔真喺好遲頓㗎，你仲要咩嘢都收收埋埋，選擇自己一個承受，你唔講人哋點知你點諗姐？

 

其實由始至終，最唔睇好呢段感情嘅就喺呀牧，而渣渣田嘅冷暴力加劇咗呢種嘅不自信。當渣渣田喺度苦惱緊KK嘅感情進擊嘅時候，完全忽略咗一旁一直照顧自己、被前度纏擾嘅呀牧。當渣渣田喺度煩緊芊芊嘅異常舉動嘅時候，佢又忽略咗呀牧嘅醋意同失望。當渣渣田拍拖後閃閃縮縮，仲在意緊其他人點睇自己嘅時候，佢又再一次完全忽略咗呀牧嘅難過。

渣渣田一次又一次的冷暴力，令牧對呢段感情徹底失去信心，再加上佢覺得被佢拗攣咗的呀田，遲早都喺會行返條搵大波妹結婚生仔嘅路，咁不如喺自己進一步泥足深陷之前早D抽身斬纜，成全對方。

 

大叔的愛總結

以上3種，你又屬於邊一種？雖然劇情好笑好嬲又好虐，每晚被Viutv搞到精神分裂咁。但自從有咗Netflix，我都好耐冇每晚坐喺電視機面前乖乖追劇，仲每日同朋友同事開心討論劇情，咁都要多謝大叔嘅一眾團隊嘅。呢套劇太多人表現有驚喜，最驚喜就喺套劇尊重劇情之餘，對白又港味十足接晒地氣，希望團隊再接再厲啦！到最後，渣渣田！回頭是岸啦！快D追返人啦！