時勢造Mirror ，Mirror造時勢

利申我唔喺鏡粉，12個成員我只認得幾個，反而Error 得4個，而且位位辨識度高，容易認。

 

任何潮流都喺一個循環，今日興嘅聽日就過晒氣，以為舊嘢原來某日又興番，道理一字咁淺。

 

我細個時興許冠傑，廣東歌熱由此而起，我小學教中文個老師狠批Sam Hui歌詞口語化，唔合所謂書面語規則，我當時心諗你識條鐵咩，日日返屋企聽住錄音帶背歌詞。唔夠幾年，潮流已經喺一片東洋風，時下興嘅喺譚詠麟張國榮梅艷芳，跟手張學友同呂方一出道就可以去紅館開演唱會，而阿爸仲話張國榮唱歌咬字唔正，阿哥已經狂loop 哥哥嘅不覊的風，雙親仲聽緊鄧麗君青山姚蘇蓉。

 

四大天王時代我已經開始少聽歌，識得最多嘅都只喺張學友嘅歌，黎明識十首八首，郭富城再少啲，劉華只喺識我恨我痴心同獨自去偷歡，但我唔會話唔知佢哋喺邊個囉。

 

之後冒起嘅陳奕迅容祖兒紅透半邊天，Twins 更加喺奇葩，不過除咗單春子，其他人嘅歌我都唔識，但唔會覺得佢地有咩問題，從來百花齊放喺好事，有自由選擇自己鍾意嘅，而唔去批鬥另一啲先喺良性現象。而我阿媽仍然鍾情鄧麗君，一啲問題都冇。

 

當個個話香港樂壇青黃不接後繼無人，Mirror異軍突起，有班人又覺得佢地未夠班，仲話唔識佢地，平行時空到咁，想點。

 

事實喺無論男團女團，總會有啲質素高啲有啲就差啲，好正常，草蜢最唱得嘅都只有蔡一傑，但唔會有人覺得剩番佢就可以取代草蜢。道理一字咁淺。

 

事實喺Mirror彈起，都唔喺突然之間，人地付出嘅努力相信唔喺人人都付得起，而現實喺人人都可以努力，但潮流亦要講時勢，宜家時勢就喺啲人唔想呢個地方再老化，亦唔想失去香港地地道道嗰陣味，要保育廣東歌，就要有新嘅生命力灌溉落去，Mirror 同Error 就表現緊呢種生命力，後生唔喺大晒，但至少唔會老油條，更加唔會老屎忽。

 

Mirror要繼續進化，先可以駕馭時勢，帶領潮流，否則一樣被時勢吞噬，被潮流淹沒。喺我認識當中，從來能夠永遠流行嘅，喺我眼中，西方只得MJ，東方嘅只有張國榮。

 

嗰十幾個後生仔可以走幾遠除咗睇佢地有幾努力，仲要睇時勢，最好喺多幾隊Mirror或Error出泥鬥過，咁樂壇想唔番生都幾難，團名可以叫Killer、Viewer或者Thriller——其實我30幾年都只喺聽緊MJ🤣。