Slashie 人生，你準備好未？

開始咗Slashie嘅生活方式一年半有多，唔短又唔長，喺呢到寫個簡單回顧，如果你打緊工有少少想做「斜槓青年」但又未開始，可以埋嚟睇下！如果你都係Slashie，歡迎搵我傾吓計！

開始Slashie前嘅心路歷程

少少背景介紹，我叫Kyle，90年出世，已經係3字頭（90後已經30歲，我都仲未接受到……），香港土生土長，屋邨長大，出生平平無奇，讀書唔叻（會考12分，冇錯，係最後幾年中五會考生），中六中七去遵理讀（其實教得幾好），大學讀OU，冇試過外國留學，比較幸運嘅係屋企人工作穩定，出嚟做嘢之前都生活平穩，唔駛憂柴憂米。
從2012年大學畢業開始計，一直打工都差唔多7年，際遇都算唔錯，由工廈小公司跳到尖沙咀、中環寫字樓跨國公司，後來有緣轉到去一間Startup，又有機會轉到騰訊，係香港以外嘅地方返工。事業發展都算幾順利。

但喺28到29歲嘅關口我開始諗，如果未來三四十年都係咁，我接唔接受到？第時會唔會後悔？

回想過去幾年嘅職業生涯，最長個份工都係兩年半（係一份我覺得好好做嘅工，冇壓力又幾自由，公司好多人做超過十年），其實我都係坐唔定嘅人，轉嚟轉去都好難搵到一份工覺得可以做到退休，自己少少進取但又鐘意試新嘢，係一間公司打工可能真係唔係我想要嘅生活。
諗住一排，覺得自己最想係財務自由，靠被動收入過活，唔係為咗無憂無慮咁吃喝玩樂，而係想唔為搵錢而投入大部分時間心機，想有時間同條件慢慢諗人生有咩值得做、值得追求，係香港呢個地方想解決「住」呢樣基本需要都已經好難，想達到呢個狀態其實都好難。但當一個人一直打工搵錢，其實好難有心機諗自己呢一世人有咩想做。不過可惜唔係富二代，係短時間內都冇條件咁做。

然後我就退而求其次，諗有冇機會先「工作自由」，對我黎講工作自由係工作上有得揀做定唔做，做嘢唔受地方限制，而又搵到唔差過全職工作嘅錢。

由2019年7月離開騰訊開始計到依家一年半有多，都算幾好彩，依家基本上係超預期達到我期望嘅狀態，平均月入5-7萬港幣，工作地點自由（係亞洲會好啲），唔係做保險，唔駛sell嘢亦唔駛跑數，冇咩壓力，但有時要趕deadline，工作量有時都大。下一篇（如果有時間寫…）就講吓我點樣由做一份全職工去到依家嘅狀態，希望令更多人知道其實除咗打一份工都有其他出路。