體驗國泰航空貴賓室 玉衡堂The Pier（Asia Miles積分）

2019年,其中一件事令我最開心既係,可以不停咁飛,因為做兼職,然後入左國泰做地勤,經常抽到時間去旅行.而且經常坐國泰,儲下飛行里數,經過幾次旅程,儲左超過一萬里數,本身唸住儲夠兩萬里數,換張來回機票,但係有一日係網站見到可以用9000 miles

 

換國泰貴賓室入場券,於是心郁郁,最後換咗一張,留翻去台北個日用.

入國泰貴賓室需要一啲資格,商務貴賓室,入場資格：商務艙乘客/馬可孛羅會銀卡或以上會員/寰宇一家藍寶石以上級別,頭等貴賓室入場資格：頭等艙乘客/馬可孛羅會鑽石卡/寰宇一家綠寶石會員.仲有一個方法,如果你係馬可孛羅會綠卡會員,可以用9000 分miles換領一次貴賓室入場券.

 

係香港機場,國泰分別有四個商務及兩個頭等貴賓室,包括：寰宇堂（商務/頭等）貴賓室 鄰近3號閘口,玉衡堂（商務/頭等）貴賓室 鄰近65閘口,玲瓏堂 鄰近8號閘口,逸連堂,鄰近36號閘口,當中玉衡堂既面積係最大,所以我就換咗玉衡堂既入場券.

 

當日朝早,我本應搭朝早十點半機,但我提早咗超過三個鐘到機場,check in 完後即係去貴賓室體驗下.第一次入Lounge,梗係影張相先

玉衡堂既設計,主要用左木系顏色,比較暖和舒適.入面分咗幾個區,休息區,自助餐區,即煮區,品茶區,淋浴間.黎到第一時間,食左早餐先,係自助餐區攞左啲西式野食,旁邊有個飲品區,有汽水果汁牛奶等,我就倒咗杯蘋果汁.不過味道唔好抱太大期望,正正常常就可以,係呢度環境比較安靜,有好多商務客工作,所以大家係呢度要保持聲量

食完後,係休息區hea咗陣,就去下一區,呢區既設計非常特別,用咗港式茶餐廳既風格,淺啡色既卡位加吊燈,突顯港式風格,另外,除咗自助區,仲有個即叫即整noodle bar,有擔擔麵,雲吞麵,叉燒包等,國泰既擔擔麵聽聞日賣千碗,出哂名,我都叫咗一碗,真係幾好味,味道濃郁.係度邊食邊睇電腦,係幾正既！

食完後,仲有少少時間先上機.係另一區,有個酒吧區,不過我唔飲酒,叫咗杯涷檸茶,坐係休息區上下網,差唔多時間就離開,預備上機

總結黎講,如果你符合入貴賓室既資格,絕對推薦去玉衡堂既貴賓室,環境非常舒適,可以係轉機或上機前黎呢度休息一下！下次希望有機會,可以黎多一次