不如用廣東話寫返篇文呀？

繼上次嗰篇廣東歌既文章之後諗諗下不如試吓用廣東話寫返篇文呀！由細到大返學上堂老師都係會教用我地用書面語作文，呢排發現其實香港人用嘅中文真係幾特別，有分書面語同口語，雖然英文都有啲好似slang咁嘅嘢，但我哋學嘅中文嘅書面語同口語用法都幾大分別。要睇一個人好唔好文采都係會書面語就斷定，識中文嘅人又未必會識寫口語，大部份都係香港人，廣東人或者馬來西亞人會識，希望可以做少少野，令呢個咁獨特嘅語言文化唔會比籠統嘅中文（書面語）取代。

 

記得以前許冠傑年代，有好多粵語歌會用到廣東話即係上述所講嘅口語黎填詞，譬如「我哋呢班打工仔⋯」「學生哥好溫書囉⋯」「半斤八両做到隻積咁嘅樣⋯」。然後到90年代，都會有幾首類似嘅作品，好似Twins嘅「你講你愛我」李彩華嘅「你唔愛我啦」等等。呢啲琅琅上口嘅歌曲同歌詞真係令人非常懷念，唔只夠地道，又容易記。但係近年來好似已經越黎越少聽到用廣東話作詞嘅歌曲，可能因為聽落比較通俗，市場唔大，所以都係會寫返書面語嘅詞。但其實，我認為廣東歌唔只係代表用中文做一首歌咁簡單，佢亦都係一個語言文化，所以用廣東話去作一首廣東歌，反而更加能凸顯出廣東歌嘅特色同味道，而且更能夠令其他人了解真正嘅廣東話。

 

如果你同我係差唔多年代，一定會經歷過ICQ同MSN，當年好興其中一種火星文。唔知大家會唔會仲記得類似咁嘅嘢呢？「艾笠U」「典解牙」「禾刀吾g牙」雖然唔知點解當年要咁樣打字，但而家諗返轉頭唔只會覺得回憶滿滿，仲覺得真係好特別同有趣，原來廣東話可以咁樣演變。然後到而家我哋會打啲咁嘅嘢「nei jo gen mei ah」「sek ng sek fan」好似真係只有香港人會睇得明自己人講緊啲乜嘢。雖然唔係話要宣揚呢啲火星文xD，但係覺得有必要令到廣東話呢一個特色嘅語言文化比更多人知道。

 

真係因為近年社會咁多動盪同變化，先會發現自己一路擁有嘅嘢係幾珍貴同特別，去到唔同嘅地方先會明白原來有好多人都會鍾意講廣東話同想學廣東話。用口語寫文章係咪就會顯得冇咁好文彩呢？應該只係因為我哋由細到大對作文呢一個概念都係圍繞喺書面語度。其實無論係講也好，寫也好，廣東話一個比較特別嘅語言。識得聽廣東話嘅人都唔一定會識得睇廣東話。譬如話「喺」「嘅」「啲」「左」呢啲字眼就算識得講但都會有好多人唔識得睇，而且我哋用呢啲字嘅時候亦都會有唔同嘅寫法，好似「喺」呢個字，有啲人會用「係」有啲會用「系」，對廣東話冇咁熟悉嘅人一定會好混亂。

 

諗一諗就連Apple嘅Siri都會同我哋講廣東話，我哋又點可以辜負外國人對廣東話嘅重視呢？有時候用書面語同台灣嘅朋友溝通得多都會時唔時有一兩個生字唔記得咗廣東話係點講，又或者有啲字已經被廣泛地取代，如果我哋唔經常講又或者用呢啲字，真係就會消失㗎啦！仲有我哋非常特別嘅廣東話揭後語「阿茂整餅 - 冇果樣整果樣」，記得當年返學嗰時仲要背同默書添！如果有機會就再同大家分享咁特別嘅揭後語啦！

 

好多嘢都係香港獨有嘅文化，而呢啲文化就只能靠我哋去延續落去，廣東話只係其中一樣。如果不甘被同化就要俾更多人認識我哋獨有一面。呢兩年聽得最多嘅一句說話好似係「今時唔同往日」，但就算係咁，我一啲都唔希望呢種獨特嘅文化會被任何野取代。珍惜擁有嘅同時，都希望可以同更多人分享我哋嘅文化！