【俄羅斯】出發前你必須要知的十件事（下）

俄羅斯真係一個好靚好抵玩嘅國家，完全適合又想去長途旅行，但又想窮遊嘅小伙伴！上集就講左去俄羅斯必須知道嘅頭五項小知識，今集就講埋之後嘅五項啦！

6. 飲食

嚟到俄羅斯根本唔好諗住要搵美食、餐餐都大魚大肉，有正常野食都已經好難得！普遍俄羅斯餐都係偏乾身，香港人未必食得慣，所以我最後決定都係食快餐，好似比當地嘅餐館好味(純屬個人感受啦)！但因為野食唔太好食，花費喺飲食嘅費用相對較少，都係一種好處吧！

7. 地鐵

莫斯科有「全球最美地鐵站」嘅稱號，最特別嘅係佢嘅裝潢！同一般大城市嘅工業風鐵路站完全唔同，佢滿滿都係壁畫、雲石、吊燈，同參觀宮殿、博物館嘅感覺差唔多！每一個站都代表某一段歷史故事，但我對俄羅斯歷史認識唔深，所以就無深入研究當中嘅故事！如果你有時間，遊地鐵河都係一個唔錯嘅行程，打下卡影下相，真係可以玩到一日！

8. 插頭

作為現代人，手機完全不離身，所以一定會問：「去俄羅斯需要帶轉插？」俄羅斯境內嘅電壓為220伏特(50赫茲)，插頭使用圓柱式歐式標準插頭！所以同香港平時用嘅扁平三腳插完全唔同，所以大家一定要帶定轉插喇！

9. 學生優惠

去到俄羅斯，你一定會去好多唔同嘅博物館同gallery參觀，但計計埋埋入場費一定好貴，可能佔你接近一半嘅旅費開支！如果你仲係學生嘅話，一定記得要喺香港申請定International Student Card，唔少地方都設有學生價，甚至係學生免費參觀嘅優惠！因為普通學校嘅學生證係無得享用學生優惠，所以呢張卡真係可以幫你慳到唔少錢！

10. 安全

我覺得俄羅斯都算係個安全嘅旅遊地方，至少我自己，同埋身邊嘅朋友，都無被偷嘢被搶嘢嘅經驗。但旅遊區嘅人就真係比較多，尤其是係紅牆，去到啲人多嘅地方，財物最好收得好少少喇！