【俄羅斯】出發前你必須要知的十件事（上）

由於經常旅遊，唔少朋友都會問我：「到底去邊度玩好？」事先聲明，無論長途短線嘅旅程我都十分之愛，但最抵玩莫過於俄羅斯！今日就同你分享，去俄羅斯前必須要知道嘅事啦！

1. 語言不通

就算你英文有幾好，去到俄羅斯都係無用，因為當地人係唔識英文！就算係機場定餐廳，都無人會用英文同你溝通，就算同佢哋「this one this one」，都無人明你講咩，所以google translate真係好重要，你全程都要靠晒佢！其實仲有個小貼士，如果你要去快餐店食嘢，最好用電話影張相俾店員睇，好過你指手畫腳幾分鐘～

2. 物價

自從盧布貶值之後，俄羅斯物價簡直抵到無人有！唔計機票住宿，淨計吃喝玩樂，我十日嘅旅程只係用咗了$2000，而當中的四分一更加係用喺買俄羅斯娃娃嘅身上。我唔算是係窮遊，一日食足三餐，想去嘅景點都有付入場費，但只係用咗$2000，就知道物價真係十分之抵！

3. 天氣

我到俄羅斯嘅時候係六月，算係剛入夏嘅時節。儘管如此，莫斯科晚上嘅氣溫卻不足10度！風好大，顯得格外凍，所以話「俄羅斯真係俄羅斯」，就算夏天都要著羽絨！仲有因為高緯度嘅原因，俄羅斯嘅夏季白晝極長，到晚上九點幾先會日落，我真係睇過晚上十二點都有陽光嘅景象。

4. 黑面

俄羅斯人真係無乜笑容，天生就黑口黑面，以為佢哋唔想理你咁樣。但我可以話你知，佢哋係得個樣係咁咋！當時我一到俄羅斯，完全搵唔到住宿嘅位置，只好去問路！遇到個Cool爆嘅女仔，首先係語言不通，其次係佢都唔識路。雖然佢仍然係黑面，但佢又幫我哋打電話去住宿嗰邊溝通，最後仲帶埋我哋去門口。所以唔好再以為佢哋真係咁難相處啊！

5. 芭蕾舞

連唔係跳舞嘅人都會聽過Bolshoi Ballet，所以去到俄羅斯點可以唔睇一場超高水準嘅芭蕾舞表演呢！莫斯科最出名的是莫斯科大劇院 (Bolshoi Theater)，可以欣賞到世界級嘅芭蕾舞表演！因為無可能買到即日嘅場次，記得要事先到莫斯科大劇院嘅官方網站購票喇！