【職場新鮮人】4個必學的儲錢貼士

大學畢業初初出黎做野，每個月有萬幾兩萬蚊人工，扣埋家用和吃喝玩樂，相信大家都有幾千到一萬剩低。如果係做freelance定part-time，收入每個月都唔同，更加要小心計算開支。現時樓價高企，買樓短期內都無咩可能，但總要儲低少少錢做旅遊經費又好，進修基金又好，積小成多日後用作首期都得，但到底點先可以有效儲到錢，唔會變又成月光族呢？以下有小小貼士俾大家參考下。

1. 出糧戶口和洗費戶口分開

大家不妨去銀行開多個戶口，令到自己出糧戶口和日常洗費戶口分開，每個月就由出糧戶口轉帳一筆預定生活開支，例如3000蚊，之後果個月就係出糧戶口每次拎幾百出黎應付交通費，食飯開支，同朋友gathering 食好西等等，咁你每次拎錢的時候就可以計算到自己該月有無大洗，甚至超支。

2. 寫下日常生活各種支出

現時有很多手機Apps可以讓大家清楚記下各種的洗費，有圖表，分類，直情是一個小管家，每次購物之後都習慣記帳，當你開apps就可以了解到自己每個月的洗費分布，清楚自己的消費模式，就可以更有效減省開支。

3. 減少無謂支出、定下階段性的儲錢目標

現時上網購物十分方便，我們往往會衝動購物，大家可以在購物前三思，想清楚自己的需要，或者到實體店看一看實物後再決定，可以減少衝動購物。另外，大家可以定下階段性的儲錢目標，例如儲夠五萬就去一次短線旅行或者買新手袋，10萬去一次長線旅行，這樣會使大家更有動力儲錢。

4. 做銀行定期/買收息股

現時銀行定期大概有0.03%息，即係放10萬一年後就會有300蚊息啦，有d銀行重會有資金優惠，利息更加高。另外，大家可以學習投資股票市場，做足功課，買一些高股息的股票，幫自己的資產升值。投資是一門實用的學問，大家一定要盡早學習啊！（投資涉及風險，股票可升可跌，各位自己注意啦。）